Հայկական լոշտակի շնորհիվ, Կորեայում ուռուցքային հիվանդությունները քիչ են

Հայերն ամբողջ Խորհրդային միությունում ամենաերկարակյաց ազգն էին, իսկ այսօր կյանքի միջին տեւողությունը բավականին իջել է: Այսօր «Տեսակետ» ակումբում ասաց բժշկական գիտությունների թեկնածու, Հայաստանում ծերագիտության հիմնադիր Գուրգեն Ապրիկյանը: Կյանքի միջին տեւողության անկման պատճառը, ըստ մասնագետի, առաջին հերթին սոցիալ-տնտեսական պայմաններն են: Իսկ խորհրդային տարիներին ամենաերկարակյաց ազգ լինելու հիմնական պատճառը գենն է եղել. «Հայաստանի վրա օտարերկրացիները շատ են հարձակում գործել եւ ընդհանրապես ծանր տնտեսական վիճակում ենք եղել եւ հայերը ստիպված բնության տված բարիքներից շատ են օգտվել՝ մրգեր, բանջարեղեն, որը ժառանգաբար ազդել է գենետիկ ֆոնդի վրա»:

Այսօր էլ Հայաստանում աճում է մի բույս, որը եւս ապահովում է մարդու երկարակեցությունը: Դա լոշտակն է, հայկական ժենշենը: Պարոն Ապրիկյանի խոսքով, հարավային Կորեայի գիտնականներն էլ Հայաստանի լոշտակն ուսումնասիրել են եւ պարզել, որ հակաուռուցքային հատկություն ունի, հիմնականում օգտագործում են դրա արմատներից ստացած սպիրտային թուրմը եւ փոշին: Ընդ որում, ապացուցվել է, որ Հարավային Կորեայի եւ Չինաստանի այն բնակավայրերում էլ, որտեղ աճեցնում են հայկական լոշտակը, ուռուցքային հիվանդությունները քիչ են:

Ծերագետի ներկայացմամբ, կանայք ավելի երկար են ապրում, քան տղամարդիկ, որովհետեւ տղամարդիկ պարզապես դիմացկուն չեն, նույնը նաեւ արու կենդանիների մոտ է:

Հարցեր, պատասխաններ, մեկնաբանություններ