Ուռուցքային հիվանդություն ունեցողների թիվը Հայաստանում տարեկան 2-4 տոկոսով ավելանում է

Ուռուցքային հիվանդություն ունեցողների թիվը Հայաստանում տարեկան 2-4 տոկոսով ավելանում է, հինգշաբթի լրագրողներին հայտնեց Հայաստանի ուռուցքաբանության ազգային կենտրոնի տնօրեն, Գիտությունների ազգային ակադեմիայի թղթակից-անդամ, պրոֆեսոր Հայրապետ Գալստյանը:

«Եթե 1997 թվականին Հայաստանում 4709 հիվանդ է եղել, ապա 2011 թվականին այդ թիվն արդեն հասել էր 7750-ի: Այլ կերպ ասած՝ եթե 1997 թվականին հարյուր հազար մարդուն բաժին էր ընկնում 179 ուռուցքային հիվանդություն ունեցող անձ, ապա նախորդ տարվա արդյունքներով՝ այդ թիվը 239 է կազմում»,- նշեց նա՝ ավելացնելով, որ ուռուցքային հիվանդությունների աճ է զգացվում ողջ աշխարհի մակարդակով:

Նրա խոսքով՝ հիվանդների թվի աճը պայմանավորված է երեք հիմնական գործոնով՝ աղտոտված էկոլոգիա, սոցիալ-տնտեսական պայմաններ, ինչպես նաև ժառանգականություն:

Կենտրոնի բժշկական մասի տնօրեն Արմեն Մուրադյանն էլ իր հերթին նշեց, որ ուռուցքային հիվանդությունների վաղ հայտնաբերումն ու համալիր բուժումը թույլ կտան հասնել լիարժեք արդյունքի:

Հայաստանի ուռուցքաբանության ազգային կենտրոնի տվյալով՝ Հայաստանում դիսպանսեր բուժում է ստանում 32 հազար հիվանդ, որոնցից 15 հազարը բուժվել են մինչև 2007 թվականը, և այժմ առողջ են:

Հարցեր, պատասխաններ, մեկնաբանություններ