Մասնագետ. Կրծքագեղձի քաղցկեղի դեպքերն ունեն երիտասարդացման միտում

Հայ կանայք համեմատաբար ավելի շատ են սկսել ուշադրություն դարձնել իրենց առողջությանը, կանանց շրջանում տարբեր հիվանդությունների վերաբերյալ տեղեկատվածության մակարդակը բարձրացել է:

Դա է վկայում Հայ-ամերիկյան առողջության կենտրոն այցելուների թվի աճը: Այս մասին ասուլիսում ասաց Կենտրոնի գործադիր տնօրեն Խաչանուշ Հակոբյանը:

«Շատ հաճախ մարդիկ չեն ցանկանում իմանալ իրականությունը` մտածելով, ավելի լավ է չիմանամ, քան իմանամ ու ամբողջ կյանքս տակնուվրա լինի: Նման տրամաբանությունը համարում եմ հետամնացություն»,- ասաց նա, ապա հավելեց, որ ճիշտ է, քաղցկեղը չի բուժվում, բայց հնարավոր է վիրահատության միջոցով կանխարգելել:

Կենտրոնի ռադիոլոգիայի բաժնի ղեկավար, բժշկական գիտությունների թեկնածու Անի Հակոբյանն էլ ասաց, որ կրծքագեղձի քաղցկեղը մահացու դատավճիռ չէ, ուղղակի հարկավոր է պարբերաբար հետազոտվել ու վաղ փուլում հայտնաբերել այն, ինչն էլ ավելի հեշտ կբուժվի:

Խ. Հակոբյանն ասաց, որ այս տարի իրենց Կենտրոն են այցելել ավելի քան 20 հազար մարդ, իսկ ստեղծման օրվանից (1997 թ.)` 211 հազար 302 մարդ, որոնցից 104 հազարը` կրծքագեղձի հետազոտության: Նա ցավով արձանագրեց, որ կրծքագեղձի քաղցկեղի դեպքերն ունեն երիտասարդացման միտում. մինչև 29 տարեկան 60 կնոջ մոտ հայտնաբերվել է քաղցկեղ: «Այդ իսկ պատճառով ահազանգում ենք, բարձրաձայնում, փորձում մարդկանց գիտակցությանը հասցնել, որ անընդունելի է, որ այս դարում մինչև 29 տարեկան կինը մահանում է կրծքի քաղցկեղից»,- ասաց Կենտրոնի գործադիր տնօրենը:

Խ. Հակոբյանը նաև ասաց, որ միչև օրս կենտրոնում հետազոտվել է 381 տղամարդ, հայտնաբերվել է 17 քաղցկեղի դեպք:

Հարցեր, պատասխաններ, մեկնաբանություններ