Կողմնային ամիոտրոֆիկ սկլերոզով հիվանդների ցողունային բջիջներով բուժումն անվնաս է. գիտնականներ. news.am

Կողմնային ամիոտրոֆիկ սկլերոզով (ԿԱՍ) տառապող 15 մարդու մասնակցությամբ հետազոտությունն ապացուցել է ցողունային բջիջների օգտագործմամբ բուժման անվտանգությունը: Սակայն այդ բուժման արդյունավետությունը դեռեւս ապացուցված չէ: Այդ մասին հայտնում են Emory University-ի գիտնականները:

Հետազոտությանը մարդիկ են մասնակցել, որոնց մոտ հիվանդության ախտանիշներն ի հայտ են եկել մոտավորապես երկու տարի առաջ: Նրանցից յուրաքանչյուրին ցողունային բջիջների 10-ից 40 ներարկում է կատարվել: Բջիջները վերցրել են ութ տարեկան սաղմից, որի հյուսվածքները տրամադրվել էին հետազոտական նպատակների համար:

Հետազոտության մասնակիցների մեծամասնությունը ողնուղեղում ցողունային բջիջների ներարկումները տարել է առանց որեւէ լուրջ կողմնակի հետեւանքի (ի հայտ են եկել ընդամենը երկու հիվանդի մոտ): Հիվանդներին հետեւել են ինը ամսվա ընթացքում. հիվանդներից մեկի մոտ ներարկումից հետո զարգացել է այտուց եւ նրա ինքնազգացողությունը վատացել է, իսկ մյուսը միջամտությունից հետո մեկ ամսվա ընթացքում ունեցել է ուժեղ ցավեր, որոնց պատճառը չի հաջողվել պարզել:

Գիտնականների կարծիքով, հետազոտության արդյունքները մատնանշում են, որ ցողունային բջիջների օգտագործմամբ թերապիան կարող է օգտագործվել ԿԱՍ-ով տառապող հիվանդների բուժման համար:

Այս հիվանդությամբ տառապողների մոտ ապաճում են շարժողական նեյրոնները, ինչը հանգեցնում է մկանների ապաճման եւ անդամալուծության: Հիվանդների մեծամասնությունը մահանում է հիվանդության առաջին ախտանիշների ի հայտ գալուց 3-5 տարի անց: Ներկայում գոյություն չունի պայքարի միջոց կողմնային ամիոտրոֆիկ սկլերոզի դեմ, որը հայտնի է նաեւ Լու Գերիգի հիվանդություն անունով:

Այժմ, երբ ցողունային բջիջներով բուժման անվտանգությունը հաստատվել է, հետազոտողները պետք է գնահատեն բուժման այդ մեթոդի արդյունավետությունը: Հեղինակները բացատրում են, որ ցողունային բջիջների կողմից արտազատվող նյութերը, որոնք կներմուծվեն հիվանդների ողնուղեղ, կկարողանան պաշտպանել առկա նեյրոնները եւ նրանց միջեւ կապերը: Դա թույլ կտա պահպանել նյարդային բջիջների գործառույթները եւ դանդաղեցնել մկանների ապաճումը:

Հարցեր, պատասխաններ, մեկնաբանություններ