Պարկինսոնի հիվանդությունը հնարավոր կլինի ախտորոշել արյան հետազոտության օգնությամբ. news.am

Ավստրալիայի La Trobe University համալսարանի հետազոտողները մշակել են արյան հազվագյուտ հետազոտություն, որի օգնությամբ Պարկինսոնի հիվանդությունը կարելի է ախտորոշել վաղ փուլերում: Նոր թեստը կարող է արյան բջիջների մետաբոլիզմում հայտնաբերել այնպիսի խանգարումներ, որոնք բնորոշ են այդ հիվանդությամբ տառապողներին:

Ներկայում Պարկինսոնի հիվանդության բացահայտման համար օգտագործվում է զանազան մեթոդների մի ամբողջ համալիր: Ճշգրիտ ախտորոշումը, սովորաբար, հաջողվում է միայն հիվանդության առաջին ախտանշանների դրսեւորումից ու այդ ախտանշանների բոլոր մյուս հնարավոր պատճառների բացառումից հետո:

Այս պահին Պարկինսոնի հիվանդության բուժման արդյունավետ ձեւեր չկան, այդ պատճառով կարեւոր է ո՛չ միայն արդյունավետ դեղերի որոնումը, այլեւ հիվանդությունը վաղ փուլերում հայտնաբերելը: Ժամանակին սկսած ֆիզիոթերապիան ու մի շարք դեղերի ընդունումը որոշ դեպքերում կօգնի կանխել կամ առավելագույն հետաձգել հիվանդության առաջխաղացումը:

Փոլ Ֆիշերի ու նրա գործընկերների մշակած նոր թեստի օգնությամբ հնարավոր է հիվանդությունն ախտորոշել վաղ, մինչեւ ախտանշանների դրսեւորումը: Թեստի օգնությամբ կարելի է հայտնաբերել մետաբոլիզմի փոփոխությունը միտոխոնդրիաներում՝ Պարկինսոնի հիվանդությամբ տառապող մարդկանց մոտ այդ բջջային կառուցվածքները մի քանի անգամ ավելի ակտիվ են, քան առողջ մարդկանց մոտ:

Գիտնականները մեթոդը հաջողությամբ փորձարկել են 38 կամավորների վրա, որոնցից 29-ը հիվանդ էին Պարկինսոնի հիվանդությամբ: Սակայն առայժմ նրանք չեն կարող համոզված լինել, որ միտոխոնդրիաների հիպերակտիվությունը բնորոշ է միայն Պարկինսոնի հիվանդությամբ տառապոող մարդկանց մոտ ու չի հանդիպում նեյրոդեգեներատիվ այլ հիվանդություններով, օրինակ, Ալցհայմերի հիավնդությունով տառապող մարդկանց մոտ:

Հետազոտողների կարծիքով, կլինիկական պրակտիկայում թեստը հնարավոր կլինի օգտագործել ոչ շուտ, քան հինգ տարի հետո:

Հարցեր, պատասխաններ, մեկնաբանություններ