Գիտնականները ցրված սկլերոզի դեմ պայքարի նոր միջոց են առաջարկել. news.am

Սթենֆորդի նյարդաբանության բաժնի մասնագետները նոր դեղ են ստեղծել, որը կարող է օգտագործվել ցրված սկլերոզի դեմ պայքարում: Դեղը փորձարկել են այդ հիվանդությամբ տառապող մկների վրա, ստացված արդյունքները հիմք են ենթադրելու, որ դեղը կօգնի պայքարել այդ հիվանդության դեմ:

Ներկայում ցրված սկլերոզով տառապող հիվանդներին ինտերֆերոնով թերապիա են նշանակում. դա չի բուժում հիվանդությունը եւ նույնիսկ չի դանդաղեցնում նրա ընթացքը, բայց թուլացնում է դրա դրսեւորումները: Սակայն շատ հիվանդների մոտ այդ դեղի օգտագործման հետ կապված կողմնակի ազդեցություններ են առաջանում: 

Այժմ գիտնականները` Լոուրենս Շտեյնմանի գլխավորությամբ, առաջարկել են ցրված սկլերոզի դեմ պայքարում օգտագործել լեղաթթվի արհեստական սինթեզված ագոնիստ` օբետիհոլային թթուն (6-ECDCA): Փորձարկումների իրականացման համար հեղինակները մկներ են աճեցրել, որոնք զուրկ են ֆարնեզոիդային Х-ռեցեպտորի դրսեւորումներից, որն օգտագործվում է լեղաթթվի սինթեզի եւ խոլեսթերինի նյութափոխանակության մեջ: Այդ ռեցեպտորը չունեցող կենդանիների մոտ վառ արտահայտված էին ցրված սկլերոզի ախտանիշները:

Կենդանիների մի խումբը 6-ECDCA է ստացել, իսկ մյուսը` հենոդեզոքսիհոլային թթու (ֆարնեզոիդ Х ռեցեպտորի բնական ագոնիստ): Բոլոր կենդանիների մոտ էական բարելավումներ են նկատվել, սակայն պարզվել է, որ 6-ECDCA-ի ընդունումն առավել արդյունավետ է: Հետազոտողներն ընդգծում են, որ նախաընտրելի է դեղի ներքին ընդունման տարբերակը,  քան ներարկումները` ինտերֆերոնի դեպքում: Ի դեպ, 6-ECDCA ընդունած հիվանդների մոտ կողմնային ազդեցություններ են արձանագրվել. փորձարկվողների 23 տոկոսի արյան մեջ բարձրացել է խոլեսթերինի մակարդակը, բացի այդ մաշկաքոր է առաջացել:

Այդ հետազոտության մասին տեղեկացնում է Proceedings of the National Academy of Sciences ամսագիրը:

Հարցեր, պատասխաններ, մեկնաբանություններ