Ստատինները կարող են նվազեցնել ուղեղի կաթվածի կրկնվելու ռիսկը. news.am

Ստատինների ընդունումը կարող է նվազեցնել ուղեղի աթերոթրոմբոտիկ կաթվածի զարգացման ռիսկը: Այդ մասին տեղեկացնում են Հիրոսիմայի համալսարանի ճապոնացի գիտնականները Մասայասու Մացումոտոյի գլխավորությամբ, ովքեր վերջերս հրապարակել են ուղեղի կաթվածի կրկնության ռիսկի վրա ստատինների ազդեցության մասին իրենց հետազոտությունը:

Ստատինները նշանակվում են արյան մեջ խոլեսթերինի մակարդակը նվազեցնելու համար: Կարծիք կա, որ դրանց ընդունումն ի վիճակի է նաեւ  նվազեցնել ուղեղի կաթվածի կրկնվելու ռիսկը: Այդ ենթադրությունը ստուգելու համար ճապոնացի գիտնականները հետազոտություն են կատարել, որին 1578 մարդ է մասնակցել, ովքեր ոչ կարդիոէմբոլիկ կաթված էին տարել: Հիվանդների մի խմբին պրավաստատին էին նշանակել` ամենատարածված ստատիններից, իսկ հիվանդների երկրորդ խումբը պլացեբո է ընդունել:

Փորձարկման մասնակիցներին դիտարկել են 5 տարի շարունակ: Ամեն տարի ուղեղի կրկնակի կաթված է ախտորոշվել յուրաքանչյուր խմբի մեջ մտնող հիվանդների մոտավորապես  2,6 տոկոսի մոտ: Նրանց մոտ, ովքեր պրավաստատին էին ընդունել, ուղեղի աթերոթրոմբոտիկ կաթված ի հայտ էր գալիս անհամեմատ ավելի հազվադեպ, սակայն ստատինների ընդունումը ոչ մի կերպ չէր ազդում ուդեղի երկու տեսակների զարգացման հաճախության վրա:

Հետազոտողները ուշադրություն են դարձնում, որ մի շարք միջազգային հրահանգներ խորհուրդ են տալիս ստատիններ ընդունել ուղեղի կաթվածի կրկնությունը կանխարգելելու համար, սակայն նրանք ընդգծում են, որ ուղեղի կաթվածը հետերոգեն հիվանդություն է եւ այդ դեղերի ընդունումը ոչ միշտ է արդյունավետ:

Հարցեր, պատասխաններ, մեկնաբանություններ