Ցուկերբերգը 25 մլն դոլար է նվիրաբերել՝ Էբոլա վիրուսի դեմ պայքարին. news.am

Facebook սոցիալական ցանցի հիմնադիր եւ գլխավոր տնօրեն Մարկ Ցուկերբերգը կնոջ՝ Պրիսցիլայի հետ միասին, 25 մլն ԱՄՆ դոլար է նվիրաբերել՝ Էբոլա վիրուսի դեմ պայքարին: Այս մասին, Forbes-ի վկայակոչմամբ, Ցուկերբերգի էջում տեղակայված հաղորդագրության մեջ է նշվում:

Հանրահայտ գործարարը նշել է, որ Էբոլա վիրուսի համաճարակը «շրջադարձային պահի» է հասել: «Հարկավոր է ամենակարճ ժամկետներում վերահսկողության տակ առնել այն եւ թույլ չտալ, որ, հետագա զարգացում ապահովելով, երկարաժամկետ հեռանկարում առողջապահությանը սպառնացող համաշխարհային ճգնաժամի վերածվի, ինչի դեմ ստիպված կլինենք տասնամյակներ շարունակ պայքար մղել, ինչպես որ ՄԻԱՎ-ի եւ պոլիոմիելիտի դեմ ենք պայքարում», - գրել է միլիարդատերը՝ Facebook-ի իր էջում՝ նշելով, որ, հանուն նման ելքի բացառման, ֆինանսական նվիրատվությունը հիվանդությունների վերահսկման եւ կանխարգելման ամերիկյան կենտրոնին եւ ոլորտի փորձագետներին օժանդակության ցուցաբերման «ամենաարագ միջոցն» է համարում:

Ցուկերբերգն առաջին ամերիկացի մեծահարուստը չէ, ով գումարներ է նվիրաբերում՝ Էբոլա վիրուսի դեմ մղվող պայքարին: Սեպտեմբեր ամսին Բիլ Գեյթսի եւ Մելինդա Գեյթսի բարեգործական հիմնադրամը 50 մլն դոլարի հատկացում էր կատարել՝ նույն նպատակով, իսկ կարճ ժամանակ անց էլ գեյթսերի նախաձեռնությանը Microsoft-ի համահիմնադիր Պոլ Ալենն էր միացել՝ 20 մլն դոլարի չափով նվիրատվությամբ:

Հարցեր, պատասխաններ, մեկնաբանություններ