Գիտնականները ջրիմուռներից արհեստական մաշկ են ստեղծել. news.am

Santiago's Catholic University of Chile-ի պրոֆեսորը արհեստական մաշկ է ստեղծել, որը սկզբունքորեն տարբերվում է նախկին բոլոր մշակումներից: Այն ստեղծվել է միկրոջրիմուռների հիմքով, որոնք բնակվում են մաքուր ջրում եւ ծովային էկոհամակարգերում: Ի տարբերություն արհեստական մաշկի այլ տարբերակների՝ Թոմաս Էգանի ստեղծած արհեստական կանաչ մաշկը (ինչպիսին կոմիքսների հայտնի հերոս Խալկինն է) ընդունակ է ֆոտոսինթեզի միջոցով թթվածին արտադրել, իսկ եթե այն գենետիկորեն մոդիֆիկացվի, ապա ո՛չ միայն թթվածին կարտադրի, այլ նաեւ, օրինակ, հակաբորբոքային եւ վերականգնող ազդեցությամբ հակաբիոտիկներ եւ մոլեկուլներ :

Արհեստական մաշկ ստեղծողները, վաղ թե ուշ, լուրջ խնդրի են բախվելու. արյունատար անոթների բացակայության պատճառով մաշկը թթվածնային սնուցում ստանալ չի կարողանա: Թոմաս Էգանը նշել է, թե պարզ չէ՝ արհեստական մաշկն ինչպես կկարողանա մարմնին սերտաճել առանց թթվածնի եւ որքան երկար կենսունակ կմնա: Պրոֆեսոր Էգանի արտադրած մաշկում ջրիմուռները մինչեւ 10 օր են ապրում, այդ ընթացքում փոխպատվաստը «սերտաճում» է մարմնին եւ կանաչ գույնը կորցնում: Պրոֆեսորի կարծիքով՝ այսպիսի մաշկի օգնությամբ կարելի է բուժել զանազան վնասվածքներ՝ այրվածքներից մինչեւ բաց վերքեր: Այն չի խոչընդոտում վերքին օդի հասանելիությանը եւ դրանով իսկ նպաստում է ապաքինմանը՝ թույլ չտալով, որ օրգանիզմ վարակ անցնի:

Բելգիացի պլաստիկ վիրաբույժ Հայդի Դեբելսը ջրիմուռային մաշկը «կրեատիվ լուծում» է անվանել: Նրա խոսքով՝ վերքի վրա դրված արհեստական մաշկը, սովորաբար, վնասված հյուսվածքներին խանգարում է թթվածին եւ սնուցող նյութեր ստանալ, սակայն պրոֆեսոր Էգանի մշակումը նման թերություններից զերծ է: Ջրիմուռային մաշկն արդեն թեստավորվել է կենդանիների վրա: Բացառված չէ, որ 2017 թվականին փորձարկումներ կսկսվեն մարդկանց մասնակցությամբ:

Հարցեր, պատասխաններ, մեկնաբանություններ