Մելանոմայի դեմ մշակված նոր՝ իմունախթանիչ դեղամիջոցը հավանության է արժանացել. med.news.am

Սննդամթերքի եւ դեղամիջոցների ամերիկյան վարչությունը հավանության է արժանացրել Merck & Co Inc դեղագործական ընկերության կողմից մշակված նոր դեղամիջոցին: Այն իմունային համակարգի խթանման միջոցով, մաշկի մահացու քաղցկեղի՝ մելանոմայի դեմ պայքարի արդյունավետ եղանակ է առաջարկում: Ըստ էության, առաջարկվող մեթոդը դեռեւս նորույթ է բժշկության մեջ:

Պեմբրոլիզումաբ անունը կրող դեղամիջոցը, որը շուկա կհանվի  Keyrtruda ապրանքանիշային անվանումով, քաղցկեղի բուժման նպատակով կիրառման ենթակա առաջին իմունախթանիչն է դիտարկվում: Այն նախատեսված է նշանակել ագրեսիվ մելանոմա ախտորոշված և թերապիայի այլ տեսակներին այլեւս չարձագանքող հիվանդներին, հաղորդում է FoxNews-ը:

Նորահայտ դեղամիջոցը իմունային համակարգի կողմից քաղցկեղային բջիջների ճանաչելիության մակարդակը բարձրացնելու եւ հակահարված խթանելու նապատակ է հետապնդում: Խնդիրը իմունային արձագանքից խուսափելու տեսանկյունից ուռուցքների աճի համար մեծ հարմարավետություն ներկայացնող՝ ծրագրավորված մահի ռեցեպտոր (Programmed Death receptor, PD-1), անունը ստացած կամ նմանատիպ գործառույթ իրականացնող՝ PD-L1 անվամբ հայտնի սպիտակուցների աշխատանքի արգելափակմամբ է լուծվում:

“Սա բժշկության վերջին ճիչն է մելանոմայի դեմ պայքարում, այն կարող է նոր խթան ծառայել հիվանդության բուժմանը միտված նոր և առավել արդյունավետ միջոցների մշակման համար”, - նշել է մելանոմայի ամերիկյան կենտրոնի նախագահ եւ գլխավոր գործադիր տնօրեն Վենդի Սելիգը: Նա  հիշեցնում է, որ նոր դեղամիջոցն արդեն իսկ ագրեսիվ մելանոմայով հիվանդ և դեռ մի քանի տարի առաջ փրկության նվազագույն հույս անգամ չունեցող բազմաթիվ մարդկանց կյանք է փրկել:

Մելանոման մաշկի քաղցկեղի ամենամահացու տեսակն է: Ամեն տարի այն շուրջ 76 հազար ամերիկացիների է ախտահարում, մինչ հիվանդությունից մահացածների թիվը նույն ժամանակահատվածի ընթացքում, քաղցկեղի ազգային ինստիտուտի տվյալներով, մոտավորապես 10 հազար է կազմում:

Սննդամթերքի եւ դեղամիջոցները ամերիկյան վարչության հաղորդմամբ, Keytruda-ն կլինիկական փորձարկումների արդյունքում ագրեսիվ մելանոմայից տառապող և թերապիայի բոլոր այլ միջոցների ազդեցությամբ առավել վատթար վիճակի հասած հիվանդների մոտ առկա ուռուցքի չափերի շուրջ 24 տոկոսով կրճատում է նկատվել:

Keytruda-ի արդյունավետության վերաբերյալ որոշման վերջնաժամկետը հոկտեմբերի 28-ն էր համարվում, սակայն վարչության փորձագետները որոշել են գրեթե երկու ամիս շուտ դրական եզրակացություն տալ:

“Մենք հաստատակամ ենք և պատրաստ ամեն ինչ անել, որպեսզի  դեղամիջոցը մելանոմայից տառապող հիվանդներին հնարավորինս կարճ ժամկետներում հասանելի դառնա”, - խոստացել է դոկտոր Սելիգը:

Հարկ է նշել, որ Rival Bristol-Myers Squibb դեղագործական ընկերությունը ևս նույն դասը ներկայացնող՝ Ճապոնիայի առողջապահական ոլորտի պատասխանատուների կողմից արդեն իսկ հաստատում գտած դեղամիջոց է մշակել եւ ներկայումս  ԱՄՆ իշխանությունների հավանությանն է սպասում դեղագործական շուկա հանելու համար:

Հարցեր, պատասխաններ, մեկնաբանություններ