Պեղումների ժամանակ հայտնաբերված մանրէները ռեզիստենտ են հակաբիոտիկների մեծ մասի հանդեպ. news.am

Աշխարհի ամենաերկար քարանձավներից մեկում՝ ԱՄՆ-ի Լեչուգիլյայում իրականացվող պեղումների ժամանակ McMaster University-ի եւ The University of Akron-ի գիտնականները եզակի մանրէներ են հայտնաբերել: Այս մանրէները, որոնք ստացել են Paenibacillus անունը, 4 մլն տարի շարունակ արտաքին աշխարհից մեկուսացված են եղել, սակայն ինչ-որ կերպ կայուն են մնացել ներկայում գոյություն ունեցող հակաբիոտիկներից 18-ի նկատմամբ, այդ թվում՝ նաեւ վերջին սերնդի հակաբիոտիկների նկատմամբ, որոնք միայն ամենածայրահեղ դեպքերում են օգտագործվում, երբ մյուս դեղերն անզոր են:

Կարելի է եզրակացնել, որ էվոլյուցիան Paenibacillus-ներում պաշտպանական մեխանիզմներ է մշակել առաջին հակաբիոտիկներից բխող պոտենցիալ սպառնալիքի երեւան գալուց շատ ավելի վաղ:

Մեխանիզմների հետազոտության ընթացքում, որոնց օգնությամբ Paenibacillus-ը պաշտպանվում է դեղերի ազդեցությունից, հետազոտողները 5 պոտենցիալ ուղղություն՝ 5 մեխանիզմներ են հայտնաբերել, որոնք այդ միկրոօրգանիզմները կարող են գործարկել իրենց կենսունակության պահպանման համար:

Այս մեխանիզմները հետազոտելով՝ գիտնականները կարող են նախապես հակաբիոտիկներ մշակել, որոնց դեմ այդ պաշտպանությունը չի գործի:

Լեչուգիլյա քարանձավն իր անկայունության պատճառով երկար ժամանակ այցելությունների համար փակ էր: Այնտեղ մտնել թույլատրում էին միայն գիտնականներին, եւ հասանելիության սահմանափակումը նրանց հնարավորություն է ընձեռել հետազոտելու մանրէների զարգացումը, որոնց կենսագործունեության վրա մարդկային ակտիվությունը չի ազդել: Paenibacillus մանրէները հայտնաբերվել են մոտավորապես 300 մետր խորության տակ:

Հարցեր, պատասխաններ, մեկնաբանություններ