Գիտնականները հազարավոր անհայտ վիրուսներ են հայտնաբերել. news.am

Անողնաշարավորները 1445 վիրուսների փոխանցողներ են, որոնց մի մասը առ այսօր ուսումնասիրված չեն: Դրանք հայտնաբերել են Ավստրալիայի եւ Չինաստանի գիտնականները, ովքեր հետազոտության արդյունքները հրապարակել են Nature ամսագրում:

Աշխատանքի հեղինակներից պրոֆեսոր Էդվարդ Հոլմսը հայտարարել է, որ այս բացահայտումն ամբողջությամբ փոխում է վարակաբանության մասին գիտնականների պատկերացումները: Հիմա նրանք ենթադրում են, որ միջատները, սարդերն ու որդերը վիրուսներ փոխանցողներ են եղել միլիարդավոր տարիներ, այլ ոչ թե միլիոնավոր, ինչպես նախկինում էր համարվում:

«Զարմանալի է, որ միջատներն այդքան մեծ քանակությամբ վիրուսներ են կրում: Մինչեւ հիմա ոչ-ոք չէր մտածում անգամ ուսումնասիրել դրանք, քանի որ վարակի դեպքեր չէին արձանագրվել»,- նշել է Հոլմսը:

Նրա խոսքով՝ հետազոտության ընթացքում միանգամայն նոր տեխնոլոգիաներ են կիրառվել, որոնք օգտագործվում են նաեւ մարդու հիվանդությունների պատճառները բացահայտելու համար: Պարզվել է, որ անողնաշարավորները վաղուց հայտնի վիրուսների փոխանցողներ են, այդ թվում՝ գրիպի:

Միաժամանակ, մասնագետները նշել են, որ հետազոտությունը մարդկանց չպետք է ստիպի վախենալ անողնաշարավորներից: Նրանց խոսքով՝ մարդու համար բավականին դժվար է վարակվել միջատներից:

Հարցեր, պատասխաններ, մեկնաբանություններ