Գիտնականներն օրգանիզմում հերպեսի վիրուսը ոչնչացնելու միջոց են գտել. news.am

Հերպեսի վիրուսը մինչ այժմ անպարտելի էր համարվում, սակայն Ուտրեխտի համալսարանի (Նիդերլանդներ) մասնագետները մարդու օրգանիզմից այն գենետիկական մակարդակում հեռացնելու միջոց են գտել: 

Այսօր գոյություն ունեցող բոլոր դեղերը եւ բուժման միջոցներն ուղղված են հերպեսով վարակման ախտանիշների ճնշմանը եւ իմունիտետի բարձրացմանը, որովհետեւ վիրուսից ուղղակիորեն ազատվելու միջոցներ չկային: Սակայն այժմ վիրուսի դեմ պայքարի համար գիտնականները CRISPR համակարգն են նախատեսել, որը նախատեսված է գեների խմբագրման համար: 

Գիտնականները բացատրել են, որ երբ ԴՆԹ-ի շղթան կտրվում է, վնասվածքները սովորաբար վերականգնվում են, բայց այդ տեղում հաճախ սխալներ եւ մուտացիաներ են առաջանում. եթե վիրուսային ԴՆԹ-ն ճեղքվի երկուսից ավելի տեղում, շանս կա, որ վիրուսն ի վիճակի չի լինի գործել:

Գիտնականներն այդ մեթոդը փորձարկել են կապիկի եւ մարդու բջիջների վրա, որոնք վարակվել էին Էպշտեյն-Բարրայի վիրուսով (հերպեսի տարատեսակ): Պարզվել է, որ եթե վիրուսի ԴՆԹ-ն մեկ տեղում ճեղքվի, դրա ակտիվությունը նվազում է 50 տոկոսով, իսկ եթե երկու` վիրուսը 95 տոկոսով անհետանում է բջիջներից: Հասարակ տեսակի հերպեսի (HSV-1) դեպքում ամեն ինչ անհամեմատ ավելի բարդ է եղել, սակայն այդ մեթոդը թույլ է տվել կանխել վիրուսի հետագա բազմացումը:

Կենսաբանները հույս ունեն, որ այդ տեխնոլոգիան թույլ կտա հաղթահարել հերպեսային վարակները` ինչպես ակտիվ, այնպես էլ թաքնված, որոնք քնած են օրգանիզմում եւ հարմար պահի են սպասում: Գիտնականներն այժմ մտադիր են կենտրոնանալ նրա վրա, թե CRISPR-ն ինչպես կաշխատի օրգանիզմում եւ թե որքանով անվնաս կլինի նման մեթոդը մարդկանց վրա կիրառելը: 

Հիշեցնենք, որ հերպեսի վիրուսը մի քանի տարատեսակ ունի եւ մի շարք հիվանդություններ է առաջացնում, սկսած մաշկի պարզ ցանից մինչեւ բնածին արատներ եւ Ալցհայմերի հիվանդություն:

Հարցեր, պատասխաններ, մեկնաբանություններ