Գիտնականները պարզել են մահացու գերմանրէների արագ տարածման պատճառը. news.am

Հակաբիոտիկների օգտագործումը չի արագացնում մանրէների շրջանում դեղերի նկատմամբ կայուն գեների տարածումը, ցույց են տվել Դյուկի համալսարանի միկրոկենսաբանները:

Նախկինում համարվում էր, որ մեկ միկրոօրգանիզմից մյուսին գեների արագացված փոխանցումը հակաբիոտիկների նկատմամբ անընկալունակ գերվարակների «պայթուցիկ» տարածման հիմնական պատճառն է: Հետազոտությունը հրապարակվել է Nature Microbiology ամսագրում:

Միկրոօրգանիզմներն ի վիճակի են գեներ փոխանակել կոնյուգացիայի միջոցով` երկու բջջի շփման պարագայում ժառանգական նյութի տեղափոխմամբ:  Դեղերը, սովորաբար, ոչնչացնում են ախտածին մանրէների մեծ մասը, սակայն ողջ մնացած բջիջները, որոնք բարձր կայունություն ունեն, արագ լցնում են ազատված տարածությունը եւ սկսում հաղորդակցվել մեծ քանակությամբ այլ մանրէների հետ:

Սակայն գիտնականները ենթադրում էին, թե հակաբիոտիկների ազդեցության դեպքում կարող է լրացուցիչ մեծանալ գենետիկ փոխանակման արագությունը: Մինչ այժմ չէր հաջողվել ստուգել դա, որովհետեւ հետազոտողներին խանգարում էր մանրէների բազմացումը, ինչն ինքնին նպաստում է կայունության գեների տարածման տեմպերի մեծացմանը:

Փորձարկման ընթացքում մանրէական բջիջները սուզել են յուրահատուկ անաբիոզի մեջ, որում դրանք չէին կարող վերարտադրվել, բայց կարող էին գեներ փոխանակել: Միկրոկենսաբանները ստուգել են  ախտածին միկրոօրգանիզմների կայունության արագ տարածմամբ ինը տեսակ` դրանք ենթարկելով տասը տեսակի հակամանրէական դեղի ազդեցության: Պարզվել է, որ հակաբիոտիկների բարձր կենտրոնացման պարագայում փոխանակման արագությունը ո՛չ միայն չի մեծանում, այլեւ որոշ դեպքերում նույնիսկ նվազում է:

Գիտնականների խոսքով, դա նշանակում է, որ չնայած որոշ դեղեր, օրինակ` տետրացիկլինը, կարող են ակտիվացնել այն գեները, որոնք նպաստում են բջիջների շրջանում կայունության տարածմանը, հակաբիոտիկներն, ընդհանուր առմամբ, գլոբալ փոփոխություններ չեն առաջացնում բջջային մակարդակում:

Հարցեր, պատասխաններ, մեկնաբանություններ