Սովորական կաթոցիկը կարող է Էբոլայով հիվանդի կյա՞նքը փրկել. news.am

Սովորական հեղուկով լի կաթոցիկը Արեւմտյան Աֆրիկայի՝ Էբոլայի ճիրաններում հայտնված երկրներում կարող է բազմաթիվ մարդկանց կյանք փրկել: Սակայն այս պարզագույն մեթոդը հաճախ անտեսվում է՝ համոզմամբ, որ հիվանդության դեմ արդյունավետ բուժում գոյություն չունի:

«Էբոլա տենդի բուժմամբ զբաղվող կենտրոնները միայն կարանտինի գործառույթ չպետք է իրականացնեն: Հիվանդները տհաճությամբ դրանց օգնությանը կդիմեն, եթե առաջարկվող խնամքը եւ օգնությունը որակապես բարձր չլինի այն օժանդակությունից, որն ընտանիքի անդամները կարող են առաջարկել», - նշել են Lancet ամսագրում հրապարակված հոդվածի համահեղինակներ Յան Ռոբերթսը՝ Լոնդոնի հիգիենայի ու արեւադարձային բժշկության դպրոցից եւ Անդերս Պերները՝ Կոպենհագենի համալսարանից: 

ԱՀԿ-ի կողմից տարածված տեղեկությունների համաձայն, Էբոլա վիրուսի՝ վերջին տարիներին Աֆրիկայում բռնկված խոշորագույն համաճարակի զոհերի թիվն ավելի քան 6 հազարի է հասել, վարակվածներինը՝ շուրջ 17 հազարի:

Սակայն հիվանդներից շատերն, ամենայն հավանականությամբ, ոչ թե հիվանդությանը հատուկ արյունահոսության, այլ սրտխառնոցով, փսխումով եւ փորլուծությամբ բնորոշվող խիստ ծանր ջրազրկման եւ էլեկտրոլիտային հավասարակշռության խախտման արդյունքում են մահանում:

Հանգամանքը, որ մինչ այժմ հիվանդության դեմ որեւէ պատվաստանյութ կամ դեղամիջոց չի մշակվել, պատճառ է դարձել տարածված մոլորության, թե իբր վարակի դեմ արդյունավետ բուժում գոյություն չունի:

Հեղուկների եւ էլեկտրոլիտների ներերակային ներարկման մեթոդը բավականին բարձր արդյունավետությամբ է աչքի ընկնում, մինչդեռ ներկայումս հիվանդներից շատերն ընդամենը պերօրալ ռեհիդրատացիոն թերապիա են ընդունում եւ հաճախ հենց հեղուկների ու էլեկտրոլիտների պակասից մահանում:

Հարցեր, պատասխաններ, մեկնաբանություններ