ՄԻԱՎ-ի դեմ կիրառվող դեղամիջոցները՝ ցրված սկլերոզի դեմ. med.news.am

Գիտնականների վերջին տարիների հետազոտությունները  պարզել են, որ ՄԻԱՎ-ի դեմ կիրառվող դեղամիջոցները կարող են նաև ցրված սկլերոզի բուժման արդյունավետ միջոց ծառայել: Գիտնականների ուշադրության կենտրոնում է հայտնվել այն հանգամանքը, որ ՄԻԱՎ-վարակակիր մարդկանց մոտ հազվադեպ է ցրված սկլերոզ զարգանում:

ՄԻԱՎ վիրուսը մարդու իմունային համակարգի քրոնիկ ճնշման է հանգեցնում: Իսկ սկլերոզի առաջացման նախապայմանը ագրեսիվ և անոմալ բնույթի իմուն հակամարմինների գրոհն է նյարդային բջիջների միելինային թաղանթի վրա: Միելինային թաղանթից զրկված բջիջները այլևս չեն կարող արդյունավետ կերպով նյարդային ազդակներ փոխանցել, ինչը հղի է կաթվածի առաջացմամբ, տեսողության կորստով, անմիզապահությամբ, ինչպես նաեւ մտավոր կարողությունների եւ զգայունության նվազեցմամբ, գրում է The Daily Mail-ը:

Իմունային համակարգը ճնշող դեղամիջոցները կարող են հիվանդության զարգացման վաղ շրջանում արգելակող ազդեցություն թողնել: Առավել ուշ փուլերում այս դեղամիջոցների կիրառումն արդեն ապարդյուն է լինում:

Մարիա թագուհու եւ Օքսֆորդի համալսարանները՝ Ուելսի դքսի հիվանդանոցի հետ համատեղ, հետազոտություն են նախաձեռնել 1999-2011թթ. Անգլիայում բուժում ստացած ավելի քան 21 հազար ՄԻԱՎ-վարակակիր հիվանդների շրջանում: Նրանց բժշկական տվյալները ՄԻԱՎ-ից զերծ 5 մլն. մարդկանց առողջական ցուցանիշների հետ են համեմատվել, ինչի արդյունքում պարզվել է, որ վարակակիրների մոտ ցրված սկլերոզի առաջացման հավանականությունը, վերահսկիչ խմբի հետ համեմատությամբ, 62 տոկոսով ցածր է: Այդուհանդերձ, գիտնականները դեռ պետք է պարզեն, թե որն է վերոնշյալ դրական ազդեցության ստույգ պատճառը:

Հարցեր, պատասխաններ, մեկնաբանություններ