Ընթացիկ տարվա սեպտեմբեր ամսին Էբոլայի դեմ պատվաստանյութ է փորձարկվելու

Ներկայումս Միացյալ Նահանգներում Էբոլայի դեմ պատվաստանյութ է մշակվում, որն, ամենայն հավանականությամբ, արդեն իսկ ընթացիկ տարվա սեպտեմբեր ամսին փորձարկման կենթարկվի, «ԱՄՆ առողջապահության ազգային ինստիտուտներ» կազմակերպությանը վկայակոչելով, հաղորդում է USA Today-ը:

Ինչպես վերոհիշյալ կազմակերպությունից են հայտնել, դեղորայքը, որի մշակման աշխատանքները մի քանի տարի առաջ են մեկնարկել, պրիմատների վրա լաբորատոր փորձարկումների ընթացքում դրական արդյունքներ է ցույց տվել: Ալերգիայի եւ ինֆեկցիոն հիվանդությունների ազգային ինստիտուտի (Բետեսդա, Մերիլենդ) տնօրեն Էնտոնի Ֆոզիի խոսքով, մարդկանց նկատմամբ կիրառման դեպքում պատվաստանյութի արդյունավետության վերաբերյալ առաջին տվյալները կարող են հաջորդ տարի ստացվել:

Հիշեցնենք, որ շուրջ կես տարի առաջ Արեւմտյան Աֆրիկայի մի շարք երկրներում Էբոլա հեմոռագիկ տենդի համաճարակ է բռնկվել, որի զոհերի թիվը, առողջապահության համաշխարհային կազմակերպության (ԱՀԿ) տվյալներով, ներկայիս դրությամբ 729 է կազմում: Ընդ որում, հուլիսի 27-31-ն ընկած ժամանակահատվածի ընթացքում տարածաշրջանի երեք երկրներում՝ Գվինեայում, Սիերա-Լեոնեում եւ Լիբերիայում, մահացու վիրուսով վարակման 122 դեպք է գրանցվել, որոնցից 57-ը՝ մահվան ելքով: Հաստատված եւ հնարավոր վարակման դեպքերի ընդհանուր թիվը ընթացիկ տարվա փետրվար ամսից ի վեր 1323 է կազմել: Էբոլայի մահացության մակարդակը 90 տոկոսի է հասնում:

Հիվանդության դեմ բուժման արդյունավետ միջոցներ եւ պատվաստանյութեր դեռեւս չեն գործում: ԱՀԿ-ն լայնածավալ՝ 100 մլն ԱՄՆ դոլար արժողությամբ, ծրագիր է մեկնարկել հեմոռագիկ տենդի դեմ պայքարը տրամանական ավարտին հասցնելու համար:

Հարցեր, պատասխաններ, մեկնաբանություններ