Սինգապուրին սպառնում է «դենգե» տենդի համաճարակ. պրոֆեսոր

Սինգապուրը հայտնվել է իր պատմության մեջ «դենգե» տենդի ուժեղագույն համաճարակի սպառնալիքի առաջ: Այս մասին հայտնում է տեղի Straits Times թերթը:

Մահացու վտանգավոր այդ հիվանդության գծով առաջատար փորձագետ, պրոֆեսոր Լեո Յի Սին հայտնել է, որ այս տարի, հավանաբար, կբախվեն «դենգեի» լայնամասշտաբ համաճարակի հետ:

Թեև վտանգավոր վիրուսով անցած շաբաթվա ընթացքում վարակված սինգապուրցիների թվի մասին տվյալները կհայտնեն երեքշաբթի, սակայն արդեն հայտնի է, որ մինչև ուրբաթ երեկո նոր հիվանդների թիվը հասել է 327-ի՝ գերազանցելով փետրվարի ռեկորդը՝ 322:

Հունվարի սկզբից ամեն շաբաթ վարակվում է շուրջ 300 սինգապուրցի: Պրոֆեսորի կարծիքով՝ տարվա կեսին այդ ցուցանիշը կարող է կրկնապատկվել: 

2005 թվականին երկրում բռնկված համաճարակի ժամանակ վարակվել էր 14 հազար մարդ, որից 25-ը մահացել էին: Նշենք, որ հիվանդությունը տարածում են հատուկ տեսակի մոծակները՝ Aedes Aegypti:

Հարցեր, պատասխաններ, մեկնաբանություններ