Հակաբիոտիկների անտեղի օգտագործումը կարող է դրանք անպիտան դարձնել

Հակաբիոտիկների չհիմնավորված ընդունումը թուլացնում է վարակների դեմ պայքարելու դրանց ունակությունը, քանի որ թույլ է տալիս բակտերիաներին կայունություն ձեռք բերել հակաբիոտիկների նկատմամբ: Այդ մասին այսօր լրագրողների հետ հանդիպմանն ասաց ՀՀ առողջապահության նախարարի տեղակալ Սերգեյ Խաչատրյանը:

Ըստ նրա՝ հակաբիոտիկների անտեղի օգտագործման չարաշահումների դեպքը ոչ միայն Հայաստանի, այլև ամբողջ աշխարհի խնդիրն է: «Այսօր ամբողջ աշխարհի բժշկագիտությունը մեծ մարտահրավեր ունի կապված հակաբիոտիկների դեղակայուն միջոցների դեմ պայքարի հետ»,– ասաց նա:

«Հակաբիոտիկները չի կարելի օգտագործել առանց նշանակումների, հակաբիոտիկները միայն նշանակվող դեղեր են, դրանց օգտագործումը պետք է լինի ռացիոնալ, պետք է տեղի ունենան բացառապես բժիշկների հսկողության ներքո, և եթե այսպես չվարվենք, միգուցե հայտնվենք հակաբիոտիկային ժամանակաշրջանում, քանի որ նրանք այլևս ազդեցություն չեն ունենա` դեղակայուն մանրէների պատճառով»,- բացատրեց Սերգեյ Խաչատրյանը:

Ըստ նրա՝ պայքար պետք է տարվի նաև դեղատներում հակաբիոտիկների առանց դեղատոմսի վաճառքի դեմ. այդպիսով հնարավոր կլինի նպաստել դրանց ճիշտ և ժամանակին օգտագործմանը:

Հանդիպմանը ներկա Առողջապահության համաշխարհային կազմակերպության (ԱՀԿ) հայաստանյան գրասենյակի ղեկավարի ժամանակավոր պաշտոնակատար Տատյանա Կոլպակովան իր հերթին ասաց, որ հակաբիոտիկների օգտագործումը թույլ տվեց հեշտությամբ բուժել մի շարք հիվանդություններ, կյանքի տևողությունը երկարացնել 20 տարով, նվազեցին մահվան դեպքերը, կանխվում են ինֆեկցիոն հիվանդությունների բարդությունները:

«Հակամանրէային կայունությանը բնական երևույթ է, որն արագանում է հակաբիոտիկների չարաշահումից: Կախված բնակչության կողմից դրանց անհարկի օգտագործման հետ, վերջին 25 տարում ոչ մի նոր հակաբիոտիկների դաս չի հայտնաբերվել: 2010-ին ամբողջ աշխարհում նոր հակաբիոտիկներ ստեղծող ընկերությունների թիվը հասել 4-ի»,- ասաց Տատյանյա Կոլպակովան:

ՀՀ դեղերի և բժշկական տեխնոլոգիաների փորձագիտական կենտրոնի տնօրեն Հակոբ Թոփչյանը նշեց, որ հակաբիոտիկների կայունության պատճառով բուժումը կդառնա ավելի թանկ, հիվանդները ավելի երկար կբուժվեն:

«Բնակչությունը պետք է լինի իրազեկ, որպեսզի կանխվի մենք ևս պայքարում ենք անտիբիոտիկների անիմաստ օգտագործման դեմ: Ուսումնասիրությունները հայտնաբերեցին, որ եթե մենք ամեն անգամ ուտելուց հետո ձեռքերներս լվանանք, քառասուն տոկոսով կնվազի անտիբիոտիկների ընդունումը: Կարևոր նշանակություն ունի նաև էկոլոգիապես մաքուր սննդի օգտագործումը»,- ասաց Հակոբ Թոփչյանը:

Հարցեր, պատասխաններ, մեկնաբանություններ