Մասնագետ. Սեռավարակների տարածվածությունը գնալով մեծանում է

Այսօր լրագրողների հետ հանդիպման ժամանակ մաշկաբան-սեռավարակաբան Կարեն Վարդանյանը խոսեց Հայաստանում տարածված սեռավարակ հիվանդությունների մասին և նշեց, որ հիմնականում խոսվում է ՄԻԱՎ/ՁԻԱՀ հիվանդությունից` աչքաթող անելով մնացած սեռավարակները, որոնք ևս լուրջ խնդիրներ են առաջացնում:

Բանախոսը նշեց, որ դասական վեներական հիվանդությունները հինգն են, որոնցից Հայաստանում տարածված են 2-ը` սիֆիլիսը և հոնորեան: Ըստ նրա` Հայաստանում գնալով մեծանում է սեռավարակների տարածվածությունը: 

«Առողջապահության համաշխարհային կազմակերպությունը սեռավարակները դասում է 5` թե՛ սոցիալական, թե՛ առողջապահական, թե՛ հոգեբանական գերխնդիրների շարքում»,- շեշտեց Կ. Վարդանյանը և հավելեց, որ սեռավարակ հիվանդություններն ավելի բնորոշ են վերարտադրողական տարիքի անձանց շրջանում և բացասականորեն անդրադառնում են վերարտադրողական ֆունկցիայի վրա:

Սեքսապաթոլոգ Վրեժ Շահրամանյանը իր հերթին նշեց որ սեռավարակների տարածվածությունը գնալով մեծանում է, իսկ դիմելիությունը շատ հաճախ լինում է սխալ հասցեական: Բանախոսն այս առումով կարևորեց ճիշտ տեղեկացված լինելու հանգամանքը:

Մասնագետը վարակի տարածման հավանականության առումով առանձնացրեց ռիսկային սեռական վարք ունեցող անձանց, արտագնա աշխատանքի մեկնողներին:

Հարցեր, պատասխաններ, մեկնաբանություններ