Նոր տարին իսկապես նոր դարձնելու հինգ միջոց. Սալուտեմ ամսագիր №4

Ուրախ ժամանց հարազատների ու մտերիմների հետ, գեղեցիկ նվերներ, հրաշքներ և Ամանորի հեքիաթ… Ամեն տարի բոլորս մեծ ակնկալիքներով ենք սպասում Ամանորին, սակայն ժամանակի ընթացքում հաճախ հասկանում ենք, որ մեր երազանքներից շատերը այդպես էլ չեն իրականացել։ Բախվելով իրականությանը՝ Ամանորի տոնակատարությունը շատերի համար վերածվում է անիմաստ իրադարձության, որի միակ հետևանքը դատարկված դրամապանակից առաջացած գլխացավերն են:

Կարելի՞ է արդյոք, Ամանորն իսկապես տոն դարձնել, և վերադարձնել հեքիաթի, հրաշքների գոյության այն հաճելի զգացումները, որոնք ապրել ենք մեր մանկության տարիներին։ Իհարկե՛, կարելի է, պետք է միայն հետևել մի քանի պարզ կանոնների:

• Կազմե՛ք ցանկությունների ցուցակ: Վերցրեք նոթատետր և գրիչ, մի բաժակ թեյ կամ սուրճ պատրաստեք, հարմար նստեք գեղեցիկ զարդարված տոնածառի մոտ և սկսեք երազել: Այո՛, այո, պետք է հենց երազել: Ազատություն տվեք Ձեր երևակայությանը: Գրեք այն ամենը, ինչ ՈՒԶՈՒՄ ԵՔ ԱՆԵԼ գալիք տարում: Ոչ թե այն, ինչ ուզում եք կատարվի, իրականանա, այլ այն ամենը, ինչը Ձեզնից է կախված, Ձեր կամքից, Ձեր ջանքերից: Երազանքները պետք է լինեն ազատ, գունավոր, վառ և գեղեցիկ:

• Նոր տարին դիմավորելու ստեղծագործական ծրագի՛ր մշակեք: Ձեր հարազատների և ընկերների հետ մտածեք, թե ինչպես կարող եք Ամանորի գիշերը դարձնել անմոռանալի: Կազմակերպեք մրցույթներ, խաղեր, որոնք կստեղծեն իսկական տոնական մթնոլորտ: Ստեղծեք Ձեզ համար հրճվանքի պահեր, որոնք պայմանավորված կլինեն ոչ թե շամպայնի ըմպած գավաթների քանակով, այլ հարազատ, ջերմ և հետաքրքիր միջավայրով:

• Փոխեք տան մթնոլորտը: Տեղափոխեք, վերադասավորեք կահույքը, թարմացրեք վարագույրները, անցնող տարվա երջանիկ պահերի լուսանկարները փակցրեք տան պատերին: Այդ ամենը թույլ կտա ո՛չ միայն զարդարել տունը, այլև վերափոխել Ձեր աշխարհընկալումը՝ հող նախապատրաստելով գալիք փոփոխությունների համար:

• Ամանորի գիշերը ինչ-որ նոր բան արեք: Սկսեք իրականացնել փոփոխությունների Ձեր ծրագիրը՝ ինչ-որ անսովոր, հետաքրքիր և հաճելի բան անելով. փորձեք առաջին անգամ կիթառ նվագել, Ձեր ձեռքով տոնածառի մի զարդ պատրաստեք, արտառոց որևէ բաղադրատոմսով խմորեղեն թխեք կամ կոկտեյլ պատրատեք, Ամանորը դիմավորեք օտար երկրում և այլն: Մի խոսքով՝ փոխեք Ձեր կարծրատիպերն ու քարացած համոզումները և համարձակ քայլ արեք Ձեր երազանքների իրականացման ճանապարհին:

• Ստեղծեք Ձեր երազանքների տեսանելի, շոշափելի մոդելները: Ամանորի տոնածառը զարդարեք ո՛չ միայն փայլփլուն խաղալիքներով, այլ նաև Ձեր երազանքների փոքրիկ խորհրդանշաններով: Ուզում եք գալիք տարում թռչել օդապարիկո՞վ, տոնածառից կախեք մի գեղեցիկ օդապարիկ, ցանկանում եք Եգիպտո՞ս գնալ, եղևնու ճյուղից կախեք փոքրիկ բուրգ: Կարևորն այն է, որ խորհրդանիշը հեշտ հիշվող լինի և համապատասխանի Ձեր պատկերացումներին: Ամանորի գիշերը ժամացույցի 12 զարկերի ներքո նայեք Ձեր երազանքների փոքրիկ մոդելներին և պատկերացրեք, թե ինչպես են դրանք իրականանում:

 
Հունվարի 1-ին կրկին վերցրեք նոթատետրը, աչքի անցկացրեք Ձեր ցանկությունների ցանկն ու մանրամասն գրեք, թե երբ և ինչպես պետք է իրականացնեք դրանցից յուրաքանչյուրը: Տարվա ընթացքում հետևողականորեն կյանքի կոչեք ինքնակատարելագործման այդ ծրագիրը, և նոր տարին Ձեզ համար կդառնա իսկապես ՆՈՐ:

Տարաս Վավրիկ

«ՍԱԼՈՒՏԵՄ» առողջ ապրելակերպի ամսագիր
Պետական գրանցման համար․ 211․200․00969
magazinesalutem@gmail.com
+(374) 91 64 10 15
+(374) 98 79 15 15

Հարցեր, պատասխաններ, մեկնաբանություններ