Ցածր ինքնագնահատական ունեցող մարդկանց հիմնական սովորությունները. blog.mediamall.am

Ցածր ինքնագնահատական ունեցող մարդկանց բնորոշ են մի շարք սովորություններ, որոնցից հիմնականներն են' 

1.  Համեմատելու սովորություն
   Ուրիշների հետ ինքն իրեն համեմատելու և բոլորին ներքևից վերև նայելու անձի սովորությունն, անկասկած, կախվածության նշան է: Բացառելով սեփական աձի յուրահատկությունն ու բացառիկությունը' աձն ինքնըստինքյան և աստիճանաբար դավաճանում է իրեն: Գնահատելով իրեն ուրիշների միջոցով, մարդը ռիսկի է գնում կորցնել իր համար ամենակարև՝ ինքն իրեն իրապես ճանաչելու բացառիկ կարողությունը և շնորհը: Անտեսելով սեփական ուժի աղբյուրը՝ մարդը դատապարտված է որոնելու իր համար տիրոջ, ղեկավարի, առաջնորդի, ով, հավատացե՛ք, անկասկած կգտնվի: Եթե անձը չի կողմնորոշվում և չգիտի ինչ անել իր կյանքի հետ ու ինչպես այն տնօրինել, ապա կգտնվի մեկը, ով կանի դա նրա փոխարեն:
   
   
2.  Մրցակցելու սովորությունը
   Ինչ որ մեկից ավելի լավը երևալու անձի նախանձախնդիր ներքին ցանկության ու ձգտման մեջ միշտ թաքնված է վերջինիս՝ ուրիշներից ավելի թերի, ավելի վատը լինելու փաստը և դրա հակառակն ապացուցելու անձի փորձը: Քանի դեռ մարդու ուռճացած ու ոչ բարենպաստ «Եսը» նրա կյանքի միակ առաջմղիչ ու գերնպատակ գործոնն է, ապա նա իր կյանքում միշտ «մրցավազքի» ու «պայքարի» մեջ է գտնվելու: Հիշե՛ք, որ միշտ կլինեն այնպիսիք, ովքեր լավն են և նրանցից ավելի լավերը: Ինչպես ասում են՝ միշտ լավից լավը կա: Կյանքի նպատակը միայն նրանում է, որ «լինենք», այլ ոչ թե մրցակցենք: Լինել ինքդ քեզ հետ, լինել ինքդ քեզ հավատարիմ, այլ ոչ որևէ մեկից ավելի լավը: Տեղին է մեջբերել Օշոյի հետևյալ իմաստուն խոսքերը՝ «Միայն դժբախտ մարդն է փորձում ապացուցել , որ նա երջանիկ է, միայն մահացած մարդն է պայքարում ապացուցել, որ նա կենդանի է, ապրում է, միայն վախկոտն է փորձում ապացուցել, որ նա անվախ է, քաջ ու խիզախ: Միայն այն մարդը, ով գիտի սեփական աձի «փոքրությունը», փորձում է ապացուցել իր «մեծությունը»:
   
   
3.  Հուսալու սովորությունը
   Հրաժարվելով հավատալ ինքն իրեն՝ մարդն ապրում է մշտապես հուսալով, ակնկալիքներով ու սպասումներով: Նա հույս ունի, որ ինչ-որ գերբնական ուժ, հոսանք, կամ՝ պարզապես կհայտնվի ինչ-որ մեկը, ով կօգնի իրեն անցնել կյանքի միջով: Այդպիսի մարդիկ միշտ ինչ-որ բանի են սպասում և չգիտեն էլ ինչ ակնկալել այդ անվերջանալի սպասումից: Նրանց վախեցնում է կյանքը, բայց ամենից շատ՝ դրա պատասխանատվությունը: Ապրելով ուրիշի սցենարով և ինչ-որ մեկի նավակում՝ անձն ինքն իրեն զրկում է կյանքի կախարդանքից ու հրաշքներից: Միշտ հիշե՛ք՝ հրաշքները ոտնակոխ եղած ճանապարհներում չեն, այլ անհայտ արահետներում: Մի օր, երբ ռիսկի գնաք ու որոշեք փորձել շրջել ձեր կյանքի անիվը, կտեսնեք, կհասկանաք ու կհամոզվեք, որ ձեզ առաջնորդներ պետք չեն:
   
   
4.  Ճանաչում փնտրելու սովորությունը
   Երբ անձը չգիտի իր գինը, նրան մնում է միայն կառչել շրջապատի գնահատականից: Ճանաչման և ինքնաճանաչման փնտրտուքների մեջ անձը կիսում է ոչ թե այն, ինչն իրեն է ցանկալի, այլ այն, ինչը նրան գումար կբերի ու կլցնի արժանիքների իր «քսակը»: Բայց մարդկային «Ես»-ը բավարարվել չգիտի, նա անհագ է: Եվ որքան մարդը ճանաչված ու հայտնի է դառնում, դրա հետ մեկտեղ նույնչափ ռեսուրսներ ու գործոններ են անհրաժեշտ լինում սեփական անձի կարևորությունն ու նշանակությունն ընդգծելու և շեշտելու համար: Ստացվում է փակ շրջան: Դրանից դուրս գալ հնարավոր է՝ հասկանալով, որ սեփական արժեվորումը բխում է միայն ներսից, այլ ոչ թե որոշվում է շրջապատի կարծիքով ու վերջինիս կողմից տրվող գնահատականով:
   
   
5. Մանիպուլյացիայի դիմելու սովորությունը
   Երբ մարդը չի հավատում սեփական ուժերին, նա օգտագործում է ուրիշներինն իր առաջխաղացման և սեփական նպատակներին հասնելու համար: Կամա թե ակամա նա դառնում է մանիպուլյատոր: Դրա համար նա օգտագործում է ամեն հնարավոր միջոցները, խորամանկ հնարքներն ու ճարպկությունները՝ խղճահարություն, մեղքի և այլ զգացողություններ առաջացնելով մարդկանց մեջ: Իսկ երբ նրա կողմից օգտագործվող հնարները ժամանակի ընթացքում հնանում ու դառնում են անարդյունավետ՝ չարդարացնելով սեփական սպասումներն ու ակնկալիքները, նա փնտրում ու գտնում է ավելի նորերը: Այսպես ասած՝ ժամանակի հետ զարգանում է ճարպկությունը, բայց ոչ հավատն ու վստահությունը սեփական անձի հանդեպ: Հիշե՛ք, օգտագործելով և ստորացնելով ուրիշներին՝ դուք չեք բարձրացնի ձեր ինքնագնահատականը: Ուրիշներին մանիպուլյացիայի ենթարկելու և շահարկելու փոխարեն փորձեք ինքներդ ձեզ մոտիվացնել ու զարգացնել:

Հարցեր, պատասխաններ, մեկնաբանություններ