Ճապոնացի գիտնականները աշխարհում առաջին անգամ կանցկացնեն iPS բջիջների պատվաստում մի մարդուց մյուսին. news.am

Մի խումբ ճապոնացի գիտնականներ հաջորդ տարվա սկզբին մտադիր են անցկացնել աշխարհում առաջին կլինիկական հետազոտությունը՝ ցողունային բջիջները (iPS-բջիջները) մեկ մարդուց մյուսին պատվաստելու վերաբերյալ:

Փորձի ընթացքում գիտնականները ծրագրում են iPS բջիջների օգնությամբ աճեցված աչքի ցանցաթաղանթի հյուսվածքները պատվաստել մի հիվանդի, ով տառապում է տարիքային մակուլյար դեգեներացիայից: Ընդ որում, որպես դոնոր հանդես է գալու մի մարդ, ով իմունիտետի առանձնահատուկ տեսակ ունի՝ նրա բջիջներն ունակ են հարմարվել ցանկացած օրգանիզմում:

Ճապոնացի մասնագետները համարում են, որ այս միջոցը մի շարք առավելություններ ունի, մասնավորապես, անհրաժեշտ բջիջների արտադրությունն այդ դեպքում ավելի քիչ կտեւի ու ավելի էժան կլինի: Ներկայում անմիջապես հիվանդի հյուսվածքից ցողունային բջիջներ ստեղծելու համար մոտավորապես 10 ամիս է պահանջվում, իսկ վիրահատության արժեքը մի քանի հարյուր հազար ԱՄՆ դոլար է:

Հետազոտությանը մասնակցում են Ռիքեն բնական գիտությունների ինստիտուտի, Կիոտոյի ու Օսակիի համալսարանների, նաեւ Կոբեի բժշկական կենտրոնի գիտնականները: Ճապոնացի գիտնականներն արդեն անցած տարի կարողացել են ապացուցել տեսողության հետ կապված հիվանդությունների բուժման ժամանակ iPS- բջիջների գործածման արդյունավետությունը: Նրանք հաջող վիրահատել են 70-ամյա մի կնոջ, ով տառապում է մակուլյար դեգեներացիաայից ու կարողացել են մասամբ վերականգնել նրա տեսողությունը:

«Ես վստահ եմ, որ մենք կկարողանանք ավելի շատ առաջխաղացում ունենալ այս ուղղությամբ: Անհրաժեշտ է, որպեսզի մասնագետներն ամբողջ Ճապոնիայում միավորեն իրենց ջանքերը ցողունային բջիջների մակարդակում համատեղ հետազոտությունների համար »,- ասել է Կիոտոյի համալսարանի պրոֆեսոր, Նոբելյան մցանակաբաշխության դափնեկիր Սինյա Յամանական, հայտնում է ՏԱՍՍ-ը:

Հարցեր, պատասխաններ, մեկնաբանություններ