Սերֆերը բուժել է աչքերի խնդիրը հսկայական ալիքի միջոցով

Փորձառու սերֆերը իրեն անհանգստացնող աչքի հիվանդությունից ազատվելու արմատական միջոց է ընտրել՝ պարզապես ընթացքի ժամանակ դեմքը օվկիանոսի 10 մետրանոց ալիքի մեջ մտցնելով:

61-ամյա տղամարդը տառապել է պտերիգիումից՝ եղջերաթաղանթի վրա կոնյուկտիվայի ախտաբանակական աճից: Հիվանդությունը կապում են քամու, փոշու եւ ուլտրամանուշակագույն ճառագայթների անընդհատ ազդեցության հետ: Պտերիգիումով հաճախ տառապում են սերֆերները, ինչի պատճառով էլ հիվանդությունը նաեւ անվանում են «սերֆերի աչք»: Հիվանդությունը հիմնականում բուժում են վիրաբուժական եղանակով՝ հեռացնելով ախտաբանակական գերաճած կոնյուկտիվան եղջերաթաղանթի վրայից: British Medical Journal-ում արտառոց կլինիկական դեպքը նկարագրել է բժիշկ Թոմաս Կէմպբելլը՝ (Thomas Campbell) Princess Alexandra Hospital-ից (Քլիվլենդ, Ավստրալիա):

2013թ. սկզբին Waimea Bay-ում (Հավայան կղզիներ), որտեղ ալիքների բարձրությունը հասնում է 15 մետրի, տղամարդը «սանձել» է 10 մետրանոց ալիքը: Նրա կատարին հավասարակշռությունը պահպանելով եւ շարժվելով առավելագույն արագությամբ՝ նա արագ դեմքը մտցրել է ջրի մեջ՝ դրանից հետո կարողանալով մնալ տախտակի վրա եւ շարունակելով շարժումը: «Այս ցնցող հնարքի շնորհիվ պտերիգիումը անջանվել է նրա աչքի մակերեսից»,- գրում է Կէմպբելլը:

Թեպետ անջատվելու շրջանը մի քանի օր բորբոքված է եղել, այս վիճակն անցել է ինքնուրույն՝ առանց բժշկական միջամտության: «Որքան ես գիտեմ, «սերֆերի աչքի»  դեմ պայքարի այսքան ոչ ավանդական միջոց բժշկական գրականության մեջ առաջին անգամ է նկարագրվում»,- գրում է բժիշկը:

Չնայած այն բանին, որ մեծ ալիքների վրա սերֆերները կարող են հասնել 70 կմ/ժ արագության, պտերիգիումը աչքի մակերեսից պոկելն այնքան էլ հեշտ չէ: Այս անոթային հյուսվածքը երբեմն դժվար է անջատել նույնիսկ նշտարի եւ մկրատի օգնությամբ, ասում է Նյու Յորքի Լենոքս Հիլլ հիվանդանոցի ակնաբույժ Մարկ Ֆրոմերը: Պտերիգիումից խուսափելու համար բժիշկ Ֆրոմերը խորհուրդ է տալիս արեւից պաշտպանող ակնոցներ եւ գլխարկներ կրել:

Հարցեր, պատասխաններ, մեկնաբանություններ