Այսօր կան աչքի հիվանդություններ, որոնք շատ ակտուալ են և գնալով աճում են

«Ժամանակակից տեխնիկան բացասաբար է անդրադառնում տեսողության վրա»,- այսօր հրավիրված ասուլիսում ասաց «ՕՊՏՕՄԵԴ» կլինիկայի ակնաբույժ Վարսիկ Հակոբյանը հավելելով, որ աչքերը հատուկ խնամք են պահանջում։ Բժշկուհին ընդգծեց, որ տեսողական հիվանդություններ առաջանում են նաև տարիքի հետ կապված, ինչպես նաև դրանք ի հայտ են գալիս շաքարային դիաբետ հիվանդության ընթացքում։ Ըստ նրա՝ նաև մեծ դեր է խաղում ժառանգականությունը։ «Շատ դեպքերում տեսողական խնդիրներ երեխաները ժառանգում են հենց ծնողներից»,- ասաց նա։

Նրա խոսքով՝ տարեցտարի տեսողական հիվանդությունները աշխարհով մեկ աճում են։ «Այս տարի դրանք աճել են մոտավորապես 20%-ով»,- ասաց Վ. Հակոբյանը նշելով, որ ավելի ակտուալ հիվանդություններից է համարվում հիմնականում կարճատեսությունը, ինչը գերազանցում է հատկապես երեխաների մոտ։ «Կարճատեսություն նաև առաջանում է, երբ մարդը նորմալ չի սնվում, շատ է կարդում։ Ավելի լավ է`երեխան դուրս գա բակ խաղալու, քան ամբողջ օրը գամվի համակարգչի առջև»,- ավելացրեց Լիլիթ Կիրակոսյանը հավելելով, որ մարդիկ, ովքեր ունեն տեսողական խնդիրներ պետք է շատ օգտագործեն բույսեր, յուղոտ ձուկ, A,E  վիտամիններ ու մրգեր։

Ուսումնասիրությունները ցույց են տվել, որ կարճատեսությունն անբուժելի է համարվում, հետևաբար բժիշկները խորհուրդ են տալիս տեսողական խանգարումների դեպքում անհապաղ դիմել մասնագետի։ «Երեխաները պարտադիր պետք է աչքի զննում անցնեն հատկապես դպրոցական և հասունության շրջանում։ Գոյություն ունի կարճատեսության երեք տեսակ՝ ցածր, միջին և բարձր։ Ցածրի դեպքում այն խնդիր է, որը պետք է շտկվի, իսկ բարձրի դեպքում արդեն հիվանդություն է համարվում, ինչը բուժել հնարավոր չէ»,- ասաց բժշկուհին հստակեցնելով, որ ակնոց կրելն ամենահարմար տարբերակն է համարվում, սակայն ակնոց կրում են ոչ բոլորը։ Նրա պարզաբանմամբ՝ այն չկրելու դեպքում վատ տեսողությունն ավելի է սրանում։ «Այն կարծիքը, որ ժամանակի ընթացքում, երբ առաջ է գալիս նաև տարիքային հեռատեսությունը, կարճատեսությունը վերանում է, չի համապատասխանում իրականությանը»,- նշեց բանախոսը ավելացնելով, որ հաճախ ակնոցը կանխում է նաև կարճատեսության սրացումը։

Մասնագետները փաստում են, որ կարճատեսությունը հիմնականում ակնհայտ է այն երեխաների մոտ, ովքեր ավելի շատ են հակված սովորելուն։  Հետևաբար բժիշկները խորհուրդ են տալիս գիրք ընթերցելիս չընդունել պառկած դիրք, իսկ գիքը կամ համակարգիչը պետք է լինեն 30-40 սմ հեռավորության վրա։ Ինչ վերաբերում է աչքի կորեկցիային ու լազերային վիրահատությանը, ապա մասնագետները գտնում են, որ դա կախված է մարդու առողջությունից և աշխատանքից։ «Եթե ամուսնացած են, ունեն երեխաներ և խանգարող ոչինչ չկա, կարող են վիրահատվել, եթե չունեն երեխաներ և պատրաստվում են մայրանալ, աշխատում են համակարգչի հետ, իհարկե խորհուրդ է տրվում վիրահատությունն իրականացնել ավելի մեծ տարիքում»,- նշեց Վ. Հակոբյանն ի պատասխան mardik.am-ի հարցի, հավելելով, որ ամենահարմար տարբերակը եղել և շարունակում է մնալ ակնոց կրելը։

Իսկ կոնտակտային լինզաները մասնագետները նորմալ են համարում։ Նրանք խորհուրդ չեն տալիս կրել միայն գունավոր լինզաներ։ «Օպտիկականը հաճախ փրկում է այն մարդկանց, ովքեր չեն կարողանում կրել ակնոց»,- ավելացրեց նա նշելով, որ գոյություն ունեն նաև գիշերային լինզաներ, որոնք առավել անվտանգ են համարվում։

Հարցեր, պատասխաններ, մեկնաբանություններ