Կանխատեսվում է, որ 2030 թ-ին ամբողջ աշխարհում շաքարախտով հիվանդների թիվը կհասնի 530 մլն-ի

Նոյեմբերի 14-ը շաքարախտի համաշխարհային օրն է, որի լուսաբանումն ինչպես ամբողջ աշխարհում, այնպես էլ Հայաստանում սկսվում է մեկ շաբաթ առաջ: Ինչպես այսօր լրագրողների հետ հանդիպման ժամանակ նշեց Հայաստանի շաքարախտի ասոցիացիայի նախագահ, էնդոկրինոլոգ Էլզա Հայրապետյանը, ամբողջ աշխարհում շաքարախտն ընդունվում է որպես համաճարակ, քանի որ դրա տարածվածությունը հասնում է աղետալի չափերի: Ցավոք սրտի, ըստ նրա, ներկայումս հնարավոր չէ կասեցնել դրա ընթացքը:

Է.Հայրապետյանի խոսքերով՝ կանխատեսվում է, որ 2030թ-ին ամբողջ աշխարհում շաքարախտով հիվանդների թիվը կհասնի 530 մլն-ի: Ըստ նրա՝ տարեկան շաքարախտի տարբեր բարդություններից աշխարհում մահանում է 4.3 մլն մարդ: Էնդոկրինոլոգը նշեց, որ Հայաստանում այսօր գրանցված է 56 հազար շաքարախտով հիվանդ, իսկ Երևանում` 24 հազար:

«Շաքարախտը խրոնիկական հիվանդություն է, որ մենք չենք կարող բուժել: Պարզապես փորձում ենք արյան մեջ գլյուկոզայի մակարդակը հասցնել նորմայի սահմաններին, բայց ցավոք սրտի, բժիշկներս խոստովանում ենք, որ շաքարախտի բարդությունները գնալով զարգանում են, որոնք հիվանդի մահվան պատճառ են դառնում»,- ասաց է. Հայրապետյանը: Նա նկատեց, որ շաքարախտով հիվանդը կարող է ապրել 30-40 տարի, եթե դա վերահսկվում է:

Ըստ նրա՝ Հայաստանում նկատվում է շաքարախտի դեպքերի աճ: «Հայերը չեն սիրում հետևել իրենց առողջությանը և վնասակար սովորությունները մեր մեջ չափից ավելի են արմատացած: Օրինակ՝ ծխելը, սպորտով չզբաղվելը, սխալ սնվելը: Եւ առողջության մասին մտածում ենք միայն այն ժամանակ, երբ արդեն կորցրել ենք»,- ասաց էնդոկրինոլոգը:

Նրա խոսքերով՝ Հայաստանում շատ սխալ են սնվում, դիետան բոլորի մոտ առաջացնում է բացասական էմոցիա, քանի որ մարդիկ չեն հասկանում, թե դիետան ինչ է նշանակում: «Դիետան հունարեն բառ է, որը թարգմանաբար նշանակում է առողջ ապրելակերպ: Եթե մարդը ճիշտ ապրի, ճիշտ ռեժիմով սնվի, ապա կարելի է ամեն ինչ ուտել և չգիրանալ: Ամեն ինչ կարելի է ուտել, բայց չափավոր»,- նշեց Է.Հայրապետյանը:

Էնդոկրինոլոգի նշեց, որ շաքարախտը սթրեսային հիվանդություն է, հիվանդության առաջացման խնդրում կարևոր նշանակություն ունի նաև ժառանգականությունը: Շաքարախտի առաջացման գործոններից է նաև մշտական շատակերությունը, սննդում դյուրամարս ածխաջրերի ավելցուկային օգտագործումը: Ծխախոտը նույնպես նպաստում է հիվանդության զարգացմանը: Նրա խոսքերով՝ աշխարհի տարբեր երկրներում ծխախոտի օգտագործման դեմ լուրջ պայքար է գնում, կան երկրներ, որտեղ պայքարից հետո ծխող մարդկանց թիվը զգալի կրճատվել է: Մինչդեռ Հայաստանում ծխողների թիվն ավելանում է: «Նույնիսկ 10 տարի առաջ այդքան շատ կանայք չէին ծխում, իսկ այսօր շատերիը կարծում են, որ դա մոդայիկ է, բայց պետք է ասեմ, որ նրանք ոչ թե մոդայիկ են, այլ՝ մոդայից դուրս են»,- ընդգծեց Է.Հայրապետյանը:

Հարցեր, պատասխաններ, մեկնաբանություններ