Արյունաբանական կենտրոնի դիսպանսեր հսկողության տակ է գտնվում մոտ 3800 հիվանդ, որից 900-ը` երեխա

«Մենք պլանավորում ենք Արյունաբանական կենտրոնի բազայի վրա նոր հեմատոլոգիայի, մանկական հեմատոլոգիայի, ինչպես նաև ցողունային բջիջների, ոսկրածուծի փոխպատվաստման կենտրոն ունենալ, որը համարվում է ամենաժամանակակից բուժման մեթոդներից մեկը»,- հայտարարել է այսօր Պրոֆեսոր Ռ.Յոլյանի անվան արյունաբանական կենտրոն այցելած առողջապահության նախարար Հարություն Քուշկյանը:

ԱՆ-ից հայտնում են, որ նախարարը հանդիպել է բուժանձնակազմին, քննարկել օնկոհեմատոլոգիական ծրագրի զարգացմանն առնչվող մի շարք հարցեր: Կենտրոնում Սմբատ Դաղբաշյանի ղեկավարությամբ ստեղծված աշխատանքային խումբը մշակել է Հայաստանում արյունաբանության զարգացման ծրագիր, որով նախատեսվում է Արյունաբանական կենտրոնի կլինիկական մասնաշենքում հիվանդների բուժման պայմանները և ֆունկցիոնալ ախտորոշման ծառայությունները հասցնել միջազգային չափանիշներին:

Արյունաբանական կենտրոնի տնօրեն Սմբատ Դաղբաշյանի խոսքով, վերջին երկու տարվա ընթացքում արյան հիվանդությունների բուժումը կազմակերպելու համար որոշակի ներդրումներ են կատարվել Արյունաբանական կենտրոնում:

«Ժամանակն է, որպեսզի բոլոր շահագրգիռ կազմակերպությունները, մարդիկ միավորվեն առողջապահության նախարարության պետական Արյունաբանական կենտրոնի շուրջ և իրենց բոլոր ներդրումներն ու մասնագիտական կարողությունները ներդնեն լեյկեմիայով հիվանդների բուժման գործընթացը կազմակերպելու համար»,- ասել է Սմբատ Դաղբաշյանը:

Միջազգային տվյալների համաձայն` ուռուցքային հիվանդությունների շարքում հեմոբլաստոզները կազմում են 6-7%: Տարեկան ախտորոշվող արյան չարորակ հիվանդությունների կազմում սուր լեյկոզների քանակը կազմում է 90-100 դեպք, որոնցից երեխաների մոտ՝ 25-30 դեպք:

Ներկայումս Արյունաբանական կենտրոնի դիսպանսեր հսկողության տակ է գտնվում մոտ 3800 հիվանդ, որոնցից մոտավորապես 900-ը` երեխա: Դիսպանսեր հսկողության տակ գտնվող հիվանդներից հեմոբլաստոզով տառապում է մոտավորապես 1900-ը /50%/, որոնցից 202-ը` երեխա:

Արյան չարորակ հիվանդություններով տառապող հիվանդների բուժումն իրականացվում է պետպատվերի շրջանակներում` բուժման ժամանակակից սխեմաներով, ինչը թույլ է տալիս 50-60% դեպքերում ստանալ լիարժեք կլինիկահեմատոլոգիական ռեմիսիա: Երեխաների մոտ առողջացման ցուցանիշը կազմում է 70%:

Որոշ դեպքերում ռեցիդիվների և ռեզիստենտ ձևերի ժամանակ քիմիաթերապիայի հետ մեկտեղ կարիք է առաջանում հիվանդներին կատարել ոսկրածուծի/ցողունային բջիջների փոխպատվաստում, որի արդյունավետությունը կազմում է մոտ 25%:

Արյունաբանական կենտրոնում պրոֆեսոր Սմբատ Դաղբաշյանի ղեկավարությամբ ստեղծված աշխատանքային խումբը մշակել է ՀՀ-ում արյունաբանության զարգացման ծրագիր, որը ներկայացվել է Առողջապահական ծրագրերի իրագործման գրասենյակ Համաշխարհային բանկի կողմից ֆինանսավորման համար:

Առողջապահության նախարարությունից վստահեցնում են, որ արյունաբանական ծառայության զարգացման ուղղությամբ արդեն կատարվել են որոշակի աշխատանքներ՝

• արյան հիվանդությունների ախտորոշման մակարդակի բարձրացման համար ձեռք է բերվել ցիտոֆլյուրոմետր սարքը,
• փոխներարկվող արյան բաղադրամասերի վարակային անվտանգության մակարդակի բարձրացման նպատակով ձեռք է բերվել վիրուսինակտիվացման սարքը,
• Արյունաբանական կենտրոնում առկա է ցողունային բջիջների հավաքագրման սարք և ստեղծվել է ժամանակակից սարքավորումներով հագեցված արյան բաղադրամասերի երկարատև պահպանման բանկ, որը հնարավորություն է ընձեռում պահպանել նաև հավաքագրված ցողունային բջիջները:

Մշակված ծրագրով նախատեսվում է Արյունաբանական կենտրոնի կլինիկական մասնաշենքի վերակառուցման և վերանորոգման աշխատանքների իրականացում՝ ինչը թույլ կտա հասցնել հիվանդների բուժման պայմանները միջազգային չափանիշներին, վերազինել լաբորատոր /մորֆոլոգիական, ցիտոլոգիական, մակարդելիության, բիոքիմիական, ցիտոգենետիկական, իմունոլոգիական, մանրէաբանական/ և ֆունկցիոնալ ախտորոշման ծառայությունները:

Այս ծրագրի իրագործումը հնարավորություն կտա Արյունաբանական կենտրոնում իրականացնել բարձրդեղաչափային քիմիաթերապիա, որը ներկայումս արյան չարորակ հիվանդությունների բուժման առավել արդյունավետ միջոց է:

Հարցեր, պատասխաններ, մեկնաբանություններ