Երեկ ՀՀ գիտությունների ազգային ակադեմիայի դահլիճում մեկնարկեց «Արյունաբանության եւ փոխներարկաբանության արդի խնդիրները» թեմայով միջազգային գիտա-գործնական համաժողովը..։

 

ՀՀ եւ ԼՂՀ առողջապահության նախարարությունների հովանու ներքո կազմակերպված այս միջոցառման շրջանակներում մինչեւ հոկտեմբերի 5-ը Հայաստանի եւ Լեռնային Ղարաբաղի մասնագետները հնարավորություն կունենան անմիջական շփումներ ունենալ ոլորտի առաջատար մասնագետների՝ Ռուսաստանի Դաշնության բժշկական գիտությունների ակադեմիայի ոսկրածուծի փոխպատվաստման եւ մոլեկուլյար հեմատոլոգիայի ԳՀԻ տնօրեն, ՌԲԳԱ թղթակից անդամ բ.գ.դ. Վ. Սավչենկոյի, Փարիզի Ժորժ Պոմպիդուի անվան հիվանդանոցի ուռուցքաբան-հեմատոլոգներ՝ պրոֆեսորներ Ժան Մարի Անդրիոյի, Պիեռ Կոլոննայի, արյունաբանության եւ փոխներարկաբանության ոլորտի այլ գիտնականների հետ, ծանոթանալ նրանց փորձին եւ, իհարկե, ոլորտի վերջին նվաճումներին, կունկնդրեն բազմաթիվ դասախոսություններ։

Բացելով համաժողովը, Պրոֆ. Ռ. Հ. Յոլյանի անվան արյունաբանական կենտրոնի տնօրեն, բժշկական գիտությունների դոկտոր, պրոֆեսոր Սմբատ Դաղբաշյանը հիշեցրեց, որ նախորդ համաժողովի ժամանակ քննարկվել են Հայաստանում արյան չարորակ հիվանդություններով տառապող հիվանդների բարձր դեղաչափային քիմիաթերապիայի եւ ոսկրածուծի փոխպատվաստման եղանակների կիրառման հիմնախնդիրները։ Բանախոսը շեշտեց, որ դրանց լուծման համար համապատասխան ենթակառուցվածքներ են ստեղծվում։

«Մեր կողմից մշակվել եւ գլոբալ հիմնադրամին է ներկայացվել արյան բանկի վերազինման ծրագիր, որը հավանության է արժանացել եւ ֆինանսական միջոցներ են տրամադրվել դրա իրականացման համար։ Մինչեւ տարեվերջ տարածաշրջանում առաջին անգամ կներդրվի դոնորական արյան պլազմայի վիրուսային ինակտիվացման համակարգ, որը կապահովի հավաքագրվող արյան պլազմայի վարակային անվտանգությունը»,-տեղեկացրեց Ս. Դաղբաշյանը։

Նա նաեւ նշեց, որ արյան չարորակ հիվանդություններով տառապող հիվանդների բուժման նպատակով ՀՀ–ում առաջին անգամ հնարավորություն է ընձեռվել դոնորների արյունից ցողունային բջիջներ հավաքագրել։

Պրոֆ. Ռ. Հ. Յոլյանի անվան արյունաբանական կենտրոնի եւ Գերմանիայի Համբուրգի Էպպենդորֆ համալսարանական հիվանդանոցի համագործակցության արդյունքում արյունաբանական մեր կենտրոնում կստեղծվի միջազգային չափանիշներին համապատասխանող բարձր դեղաչափային քիմիաթերապիայի եւ ոսկրածուծի փոխպատվաստման կենտրոն։ Իսկ դրա ստեղծման պայմաններից մեկն անհրաժեշտ ենթակառուցվածքների, այդ թվում՝ արյունաբանական կենտրոնում արդեն իսկ գործող միջազգային չափորոշիչներին համապատասխանող արյան բանկի եւ ժամանակակից սարքավորումներով հագեցած ախտորոշիչ լաբորատորիաների առկայությունն է։

Արյունաբանության եւ փոխներարկաբանության արդի խնդիրներին նվիրված միջազգային համաժողովի մասնակիցներին ուղղված ուղերձում ՀՀ առողջապահության նախարար, պրոֆեսոր Հարություն Քուշկյանը նշել էր. «Վերջին տարիներին բավականին դրական փոփոխություններ եւ զարգացման միտումներ են նկատվում ՀՀ արյան ծառայության եւ արյունաբանության ոլորտներում, բարելավվում են օգտագործվող արյան որակն ու անվտանգությունը, ներդրվում են բուժման ժամանակակից մեթոդներ։ Պրոֆ. Ռ. Հ. Յոլյանի անվան արյունաբանական կենտրոնը տարածաշրջանի եզակի բուժհաստատություններից է, որտեղ հիմքեր են ստեղծվել ՀՀ-ում բարձր դեղաչափային քիմիաթերապիայի եւ ոսկրածուծի, ցողունային բջիջների փոխպատվաստման կենտրոն ստեղծելու համար։  Այսօր ՀՀ-ում առկա են արյան բաղադրամասերի անձեռնմխելի պաշարներ՝ արտակարգ իրավիճակներում փոխներարկումային բուժօգնության կազմակերպման համար։ Աստիճանաբար վերազինվում եւ նորոգվում են արյան ծառայության ստորաբաժանումները, այդ թվում՝ ԼՂՀ-ում, ներգրավելով ինչպես պետական միջոցները, այնպես էլ բարերարների ներդրումները»։

Առողջապահության նախարարը նաեւ իր գոհունակությունն էր արտահայտել գիտագործնական համաժողովը ԼՂՀ բուժանձնակազմի մասնակցությամբ իրականացնելու համար։ Հոկտեմբերի 3-ին համաժողովի մասնակիցները կմեկնեն Ստեփանակերտ։ Համաշխարհային առաջատար մասնագետների հետ անմիջական շփումներն, անտարակույս, կնպաստեն հայ մասնագետների գիտելիքների բարձրացմանը, փորձի փոխանակմանը, նոր կապերի հաստատմանը։