Մանկական խաղալիքների շարքում՝ Բարբի տիկնիկների բացասական կողմը. 1in.am

Քեմբրիջի համալսարանի փորձարարական ֆիզիկայի պրոֆեսոր Աֆինա Դոնալդը մանկական խաղալիքներն անվանել է գործոններից մեկը, որոնց պատճառով աղջիկները մեծանալով՝ ավելի քիչ հետաքրքրություն են ցուցաբերում գիտական կարիերայի նկատմամբ, քան տղաները: Այս մասին հայտնում է The Guardian-ը:

Ըստ Դոնալդի՝ գիտության նկատմամբ հետաքրքրությունը ձևավորվում է մանուկ ժամանակ, մինչև 12-13 տարեկանում դպրոցականներն արդեն բավական հստակ հասկանում են, թե որ առարկաները չեն ուզում սովորել: «Աղջիկների խաղալիքներն այնպիսին են, որ դրանցով սովորաբար պասիվ են խաղում, օրինակ՝ Բարբի տիկնիկի մազերն են սանրում: Դրանք կառուցելու, երևակայությունն օգտագործելու մոտիվացում չեն ստեղծում: Չեն զարգացնում ստեղծագործական շերտը՝ ի տարբերություն կոնստրուկտորների, ինչպիսին «Լեգո»-ն է,- նշում է նա:- Եթե աղջիկները միշտ խաղում են տիկնիկներով՝ վերարտադրելով կանացի կարծրատիպային հոգսերը, ինչպե՞ս կարող են իրենց քիմիկոս կամ ինժեներ պատկերացնել»:

Պրոֆեսորը նշել է Բրիտանիայում տղաների և աղջիկների խաղալիքների գովազդներում օգտագործվող բառապաշարի խիստ տարբերությունները: Նրա խոսքով՝ տղաների համար արտադրանքը հաճախ նկարագրում են «հզորություն» և «պայքար» բառերով, իսկ աղջիկների համար ապրանքների գովազդներում՝ «մոգություն» և «սեր»: «Ես մարտերի երկրպագու չեմ, բայց ըստ իս՝ կարևոր է, որ մի դեպքում խրախուսվում է ակտիվ վարքը, մյուսում՝ պասիվությունն ու հավատը, որ մոգությունը կլուծի բոլոր խնդիրները»,- նշում է պրոֆեսորը:

Հարցեր, պատասխաններ, մեկնաբանություններ