Դպրոցական դասընթացների վաղ մեկնարկը վնասակար է դեռահասների առողջության համար. news.am

Դեռահասների դյուրագրգռության պատճառը կարող են ո՛չ միայն վարքագծային խնդիրները լինել, այլ նաեւ այն հանգամանքը, որ դպրոցական դասացուցակը երբեմն բացասական ազդեցություն է թողնում նրանց կենսաբանական ժամացույցի վրա:

Եզրահանգման հեղինակները ամերիկացի գիտնականներ են: Նրանց համոզմամբ, դասընթացների վաղ մեկնարկը կարող է տրամադրության անկման, իսկ փոփոխությունը՝ առողջության եւ ուսման կարողությունների բարելավման հանգեցնել, հաղորդում է The Independent-ը:

Learning, Media and Technology ամսագրում հրապարակված հոդվածի հեղինակները ենթադրում են, որ սովորելու եւ օպտիմալ գործառույթներ դրսեւորելու կարողությունը փոխվում է՝ կախված կենսաբանական, այլ ոչ՝ սոցիալական ժամացույցից: Քնի եւ արթուն անցկացված ժամանակի ցիլկերը (ցիրկադային ռիթմեր) բարդ, գլխուղեղի սուպրախիազմատիկ կորիզի կողմից կարգավորվող գործընթացներ են:

Տարրական դպրոցում դասընթացների մեկնարկային ժամը եւ երեխայի կենսաբանական ժամացույցը միմյանց հետ սերտ կապի մեջ են գտնվում: Իսկ ահա դեռահասության տարիքում սոցիալական եւ կենսաբանական ժամանակի միջեւ առկա հակամարտությունը սրության ամենաբարձր մակարդակի հասնելու միտում ունի:

Սեռահասունացման ընթացքում դեռահասները մի փոքր ավելի ուշ ժամի՝ երեկոյան ժամը 11-ից հետո քնելու կարիք են զգում: Հոդվածի հեղինակների տվյալներով, որեւէ վկայություն չկա առ այն, թե դասընթացների վաղ մեկնարկն օգտակար է երեխաների առողջության եւ առաջադիմության համար: Սակայն հակառակը հնարավոր է ապացուցել: ԱՄՆ ռազմաօդային ուժերի ակադեմիայում դասընթացները մի փոքր ավելի ուշ մեկնարկելու մասին որոշում է կայացվել, ինչի արդյունքում 18-19-ամյա ուսանողները առաջադիմության առավել բարձր մակարդակ են դրսեւորել:

Հարցեր, պատասխաններ, մեկնաբանություններ