Ինքնաբավարարումը նորմալ ֆիզիոլոգիական երևույթ է. սեքսապաթոլոգ

Պատանեկան տարիքում ինքնաբավարարումը նորմալ ֆիզիոլոգիական երևույթ է, և ծնողները չպետք է դրանից ողբերգություն սարքեն: Այսօր լրագրողների հետ հանդիպման ժամանակ այս մասին ասաց ԵՊԲՀ Սեքսապաթոլոգիայի կլինիկայի բժիշկ-սեքսապաթոլոգ, ԵՊԲՀ սեքսոլոգիայի ամբիոնի դասախոս, «Սեքսուալ առողջության պաշտպանություն» հ/կ-ի անդամ Վրեժ Շահրամանյանը՝ պատասխանելով հարցին, թե` ինչպե՞ս պետք է ծնողները վերաբերվեն իրենց պատանի երեխաների ինքնաբավարարման փորձերին:

Ըստ մասնագետի՝ ինքնաբավարարումը նորմալ ֆիզիոլոգիական երևույթ է, ծնողը չպետք է դա ողբերգություն դարձնի: Նրա խոսքով՝ տղա երեխայի մոտ սեռական զարգացման հետևանքով աճում է սեռական պահանջը, այդ տարիքում նա չի կարող հարաբերություն ունենալ, ուստի փոխարինող տարբերակներ են երազախաբությունը և ինքնաբավարարումը:

Անդրադառնալով աղջիկների ինքնաբավարարմանը՝ մասնագետն ասաց, որ աղջիկների մոտ դա ցայտուն չի դրսևորվում: «Նրանց մոտ չկա սերմնարտադրության խնդիրը, իսկ տղայի մոտ արտադրվում են սերմնաբջիջներ: Տղաների դեպքում ցանկալի է, որ զրուցեն հայրերը: Պետք է նաև հիգիենայի նկատմամբ ուշադիր լինեն` կեղտոտ ձեռքերով չպետք է դիպչեն սեռական օրգաններին: Պետք է սեռական դաստիարակությունը պատանեկան տարիքից ճիշտ ուղու վրա դնել»,- հստակեցրեց մասնագետը:

Հարցեր, պատասխաններ, մեկնաբանություններ