ֆիզիոթերապևտ. Դպրոցականների կեցվածքին պետք է հետևեն ոչ միայն ֆիզկուլտուրայի դասատուները

«Հայաստանում մինչ օրս բացակայում են համապատասխան պայմաններով կենտրոններ` հաշմանդամ կամ առողջական ծանր վիճակում հայտնված մարդկանց հնարավորությունների ընդլայնման կամ վերականգնման համար»,-այսօր ասուլիսի ժամանակ ազդարարեց ֆիզիոթերապևտ Արմինե Գրիգորյանը:

Բանախոսը նշեց, որ մարդկանց առողջական վիճակի բարելավման, ունակությունների ընդլայնման համար անհրաժեշտ են համապատասխան ֆիզիկական վարժություններ, հատուկ կինեզոթերապևտիկ ծրագրեր, որոնք պահանջում են ոչ միայն բարձրակարգ մասնագետներ, այլ նաև` համապատասխան դահլիճներ և սարքավորումներ, ինչը, ինքնին, կապված է լուրջ ֆինանսների հետ:

«Նման պայմաններում ոչինչ չի մնում անել, քան դիմել միայն դեղորայքային ավանդական բուժմանը, որն ավելի շատ ցավազրկող կամ հանգստացնող է, քան կարող է մարդուն ոտքի բարձրացնել, կամ մասնակի վերականգնել հնարավորությունները», - ասաց փորձագետը: Նա նաև մտահոգություն հայտնեց, որ թեև մինչև 7 տարեկան երեխաները կարող են անվճար բուժսպասարկում ստանալ, սակայն չեն կարողանում օգտվել համապատասխան ապաքինող ծրագրերից կամ համապատասխան կենտրոնների բացակայության, կամ ֆինանսական կարողությունների պատճառով:

Ըստ փորձագետի, առաջնային է, որ համապատասխան ծրագրեր իրականացվեն նաև դպրոցներում, որտեղ վերջին տարիների ընթացքում երեխաների մոտ նկատվում է ողնաշարի ծռվածության` սկոլեոզի տարածվածության մեծացումը, որը հիմնականում կապված է դասաժամերին և դասաժամերից դուրս ոչ ճիշտ նստելու, սահմանափակ շարժվելու հետ:

«Անհրաժեշտ է, որ նման խնդրի վրա ուշադրություն դարձնեն ոչ միայն ֆիզկուլտի դասատուները, այլ մյուս մանկավարժները, և դասի ժամանակ կազմակերպեն 5-րոպեանոց ֆիզկուլտուրային ընդմիջումներ, հետևեն ճիշտ և ուղիղ կեցվածքին: Եթե երեխան մատնվում է բարձիթողիի, ողնաշարի խախտումները ուղղվում են միայն վիրահատության հետևանքով», - նշեց Արմինե Գրիգորյանը:

Հարցեր, պատասխաններ, մեկնաբանություններ