Երեխաների մոտ հանդիպող առողջական խնդիրներն ավելացել են, ինչը նստակյաց կյանք վարելու հետևանք է

Այս մասին այսօրվա ասուլիսին ահազանգեց Հայաստանի բժշկական ասոցիացիայի անդամ Լուսինե Սիմոնյանը։
Մասնագետը նկատել է, որ այսօր երեխաները ճիշտ չեն սնվում, սնվելուն համապատասխան ֆիզիկական ակտիվություն չեն դրսևորում։ «Այսօվա երեխաները ավելի քիչ են խաղում դրսում, ավելի քիչ են շարժվում, ինչի հետևանքով նրանց մոտ ճարպակալման մեծ խնդիրներ են առաջանում՝ սկսած 5-6 տարեկանից մինչև 15-16 տարեկան։ Երեխան պետք է սնվի ռացիոնալ և ուտի առողջ սնունդ», - բացատրեց մասնագետը՝ հավելելով, որ երեխայի օրգանիզմին օրվա մեջ անհրաժեշտ են սպիտակուցներ, ճարպեր, ածխաջրածիններ, ջուր, վիտամիններ և միկրոէլեմենտներ։ Օրվա ընցաքում, ըստ մասնագետի, երեխան պետք է սնվի 3-4 անգամ։

Արագ սնունդ և գազային խմիչքներ այսօր երեխաներն ավելի շատ են օգտագործում, ինչը, Լուսինե Սիմոնյանի խոսքով, հանգեցնում է ճարպակալման և տարբեր հիվանդությունների։ Այսօր արդեն, նրա խոսքով, 14-15 տարեկան երեխաները բժիշկներին են դիմում ճնշման խնդիրներով։Մասնագետը ծնողներին զգուշացնում է՝ երեխաներին պետք է հնարավորինս զերծ պահել պիցաներից, խոզի մսից, խմորեղենից, հացի մեծ քանակության օգագործումից։ Փոխարենը նրանց ճաշացանկում պետք է շաբաթական 3-4 անգամ ներառել տավարի միս։

Մեծահասակների մոտ հանդիպող սիրտանոթային և մարսողական խնդիրները նույնպես, ըստ նրա, սխալ սնվելու արդյունք են։ Մասնագետի նույն խորհուրդները վերաբերում են նաև մեծահասակներին։

Ըստ նրա՝ առողջ լինելու համար մարդիկ առավոտյան պետք է անպայման նախաճաշեն։ «Ավելի ճիշտ է, երբ մարդը օրվա մեջ մի քանի անգամ է ուտում, բայց քիչ-քիչ, քան ամբողջ օրը չի ուտում, հետո ուտում է մեկ անգամ ու մեծ քանակությամբ։ Շատ կարևոր է, որ օրվա ընթացքում մեծ քանակությամբ բանջարեղեն ու միրգ ուտի մարդը»,- խորհուրդ է տալիս Լուսինե Սիմոնյանը։

Հարցեր, պատասխաններ, մեկնաբանություններ