«Կրծքով կերակրելը ոչ միայն ֆիզիկական, այլ նաև հոգեբանական առումով շատ կարևոր է»

Այսօր մամուլի ասուլիսում մանկաբույժ, համալսարանական պոլիկլինիկայի տնօրեն Աննա Բալյանը, զարգացման մանկաբույժ Իրինա Թովմասյանը և վերականգնողաբան Գայանե Զախարյանը խոսեցին արհեստական  կաթնախառնուրդների բացասական ազդեցության մասին:

Աննա Բալյանը միանշանակ պնդեց, որ երեխային կերակրելու լավագույն տարբերակը կրծքով սնուցումն է: Նա նշեց, որ երեխային մինչև վեց ամսական պետք է բացառապես կրծքով կերակրել:

Գայանե Զախարյանը նշեց, որ երբ մայրը կրծքով կերակրում է երեխային, ապա երեխան իրեն ավելի ապահով է զգում: «Կրծքով կերակրելը ոչ միայն ֆիզիկական, այլ նաև հոգեբանական առումով շատ կարևոր է»:  Նա նշեց, որ ուսումնասիրության արդյունքները ցույց են տվել, որ եթե երխայի և մոր միջև կապը լավ չի հաստատվում, ապա հետագայում որոշ երեխաներ դեռահասության տարիներին վարքագծային խնդիրներ են ունենում:

Աննա Բալյանը ներկայացրեց մեկ այլ ուսումնասիրության արդյունքներ, ըստ որի՝ եթե երեխայի ծնվելուց հետո մայրն անմիջապես սկսվում է նրան կրծքով կերակրել և երեխան 30-60 րոպե մոր գրկում է մնում, ապա մանկական մահացության ցուցանիշը 20 տոկոսով նվազում է:

Իրինա Թովմասյանն ասաց, որ մեկ տարեկանից հետո երեխաները փորձում են ինքնուրույն ուտել, և  ծնողները չպետք է նրանց զրկեն ինքնուրույնությունից, հակառակ դեպքում՝  երեխան ուտելու նկատմամբ հետաքրքրությունը կորցնում է: 

Ինչ վերաբերում է մայրերի այն անհանգստությանը, թե իրենք կաթ չունեն կամ այն չի բավարարում երեխային, ապա  Աննա Բալյանն ասաց, որ հազվադեպ է լինում, երբ մայրը կաթ չի ունենում, պարզապես համբերություն և ճիշտ մոտեցում է պետք:   Իսկ եթե իսկապես կրծքի կաթը բավարար չէ երեխային, մանկաբույժը  խորհուրդ տվեց երեխային տալ կաթնախառնուրդներ:

Հարցեր, պատասխաններ, մեկնաբանություններ