Էկզեման հաճախ մանկականից վերածվում է մեծահասակների հիվանդության

Նոր հետազոտությունը ցույց է տվել, որ էկզեմայով բազմաթիվ երեխաների մոտ մաշկի հետ խնդիրները կարող են շարունակվել նաեւ հասուն տարիքում: Թեպետ էկզեման, կամ ինչպես այն անվանում են՝ ատոպիկ դերմատիտը, հաճախ առաջանում է մանկական տարիքում, նոր հետազոտության համաձայն, էկզեմայով երեխաները, շատ հավանական է, որ շարունակեն ունենալ մաշկային խնդիրներ ընդհուպ մինչև 20 տարեկանը, իսկ որոշ դեպքերում՝ նաեւ ամբողջ կյանքում, հաղորդում է webmd.com-ը:

«Էկզեման մաշկային հիվանդություն է, որը հիմնականում փոքր երեխաների մոտ է լինում: Այսպիսի հիվանդների մոտ մաշկը շատ զգայուն է՝ բորբոքումների, ինֆեկցիաների եւ ալերգիաների հակումով», - ասում է Նյու Յորքի Մաունթ Սինայ հիվանդանոցի մաշկաբան Ջոշուա Զեյխները: «Հիվանդության տարբերակիչ նշան է քորը, որը դեղորայքի համար աննկարագրելի ծախսերի պատճառ է դառնում, բերում է կյանքի որակի եւ միջանձնային հարաբերությունների վատթարացման, ինչպես նաեւ ուսման եւ աշխատանքի ժամանակի կորստի»:

Նախկինում համարվում էր, որ էկզեման անցնում է, երբ երեխաները մեծանում են, ասում է Զեյխները: Այդ իսկ պատճառով փորձագետները երկար տարիներ հետեւել են հիվանդության բնականոն ընթացքին եւ հայտնաբերել, որ ախտանիշները կարող են պահպանվել ավելի երկար, քան նախկինում կարծում էին՝ ձգվելով մինչեւ կյանքի երկրորդ տասնամյակ եւ ավելի:

Փենսիլվանիայի համալսարանի Պերելման բժշկական դպրոցի հետազոտողներ բժիշկ Դեվիդ Մարգոլիսը եւ իր գործընկերներն ուսումնասիրել են էկզեմայի ախտանիշներն ավելի քան 7100 երեխաների մոտ՝ երկար ժամանակի ընթացքում: Ախտանիշները սկսվելուց երեխաների միջին տարիքը երկու տարեկանից չէր անցնում:

JAMA Dermatology ամսագրում հրապարակված հետազոտության մեջ ասվում էր, որ երեխաների ավելի քան 80%-ը շարունակել է տառապել էկզեմայի ախտանիշներից եւ դեղորայք խմել մինչեւ 26 տարեկան:

Եվս 5 տարի հետո հիվանդների 64%-ը հայտարարել են, որ չի եղել այնպիսի 6-ամսյա ժամանակահատված, որի ընթացքում նրանք մաշկին դեղ չեն քսել:

Սակայն հետազոտողները նշում են, որ ծրագրում մասնակցություն են ունեցել միայն էկզեմայի ծանր տեսակով տառապող երեխաներ, որը շատ դժվար է բուժման ենթարկվում:

«Էկզեմայով երեխաները եւ նրանց ծնողները պետք է հատուկ ուշադրություն դարձնեն մաշկի խոնավացմանը ճիշտ բաղադրիչներով, ինչպիսին ցերամիտներն են, որոնք այդպիսի երեխաների մաշկում գենետիկորեն բացակայում են», - ասում է Նյու Յորքի Լենոքս Հիլլ հիվանդանոցի մաշկաբան Դորիս Դեյիզը:

«Մաշկն անհրաժեշտ է խնամել նույնիսկ այն ժամանակ, երբ ախտանիշները շատ արտահայտված չեն, եւ էկզեման վերահսկելի է», - շարունակում է բժիշկը: «Կարեւոր է նաեւ վերահսկել սթրեսը, որովհետեւ սթրեսը նույնպես ուժեղացնում է էկզեմայի ախտանիշները»:

Հարցեր, պատասխաններ, մեկնաբանություններ