Ինչո՞ւ է տղամարդկանց մոտ առավոտյան ժամերին էրեկցիա առաջանում. news.am

Առավոտյան ժամերին ի հայտ եկող էրեկցիան անխտիր բոլոր տղամարդկանց պարագայում նորմալ ֆիզիոլոգիական բնույթ է կրում: Փորձենք պարզել, թե ինչպես է երբեմն տհաճությունների պատճառ հանդիսասող այդ երեւույթը գիտականորեն բացատրվում: Սպոնտան էրեկցիա գիտական անվանումը ստացած ֆենոմենը սովորաբար գիշերային ժամերին, կամ արթնանալիս է զգացնել տալիս:

Ընդ որում, էրեկտիլ դիսֆունկցիայով չտառապող բոլոր տղամարդիկ քնած ժամանակ կարող են 3-5 անգամ երեւույթի կրողը դառնալ, հաղորդում է IFL Science-ը: Ըստ սաղմնաբանների բացահայտումների առնանդամի գիշերային պրկվածությունը նույնիսկ արգանդում՝ պտղի մոտ է նկատվում: Այն կարող է ամբողջ կյանքի ընթացքում տղամարդու անբաժան ուղեկիցը դառնալ: Տղամարդիկ այս հարցում միայնակ չեն. կանանց մոտ էլ քնած ժամանակ կլիտորային էրեկցիա եւ հեշտոցային կոշտացում կարող է ի հայտ գալ: Նույն երեւույթը նաեւ մի շարք կանթասուն կենդանիների մոտ է նկատելի:

Այս ուղղությամբ վերջին տարիներին կատարվող հետազոտությունները թեեւ սպոնտան էրեկցիայի մի շարք բացատրություններ են տալիս, բայցևայնպես դրանք բոլորն էլ շարունակում են անապացույց մնալ: Տեսություններից մեկի համաձայն առնանդամի գիշերային պրկվածությունը ազոտի օքսիդի բուռն արտազատման արդյունքում է ի հայտ գալիս: Արյունատար անոթների ներքին պատը կազմող էնդոթելիալ բջիջներից արտազատվող այս միացությունը հզոր անոթալայնիչ հատկությամբ է օժտված: Անոթների լայնացման արդյունքում արական արտաքին սեռական օրգանի հատուկ հյուսվածքներն ակտիվ արյունամատակարարվում են:

Այս ամենի կարգավորման բարձրագույն կենտրոնը գլխուղեղի երկու հատուկ կառույցներն են իրականացնում՝ վառոլյան կամուրջն ու հիպոթալամուսը: Ընդհանրապես, էրեկցիայի երկու տեսակ գոյություն ունի՝ հոգեծին եւ ռեֆլեքսային: Առաջինը գրգռիչ մտքերի կամ պատկերների խթանմամբ եւ նյարդային ազդակների օգնությամբ տեղի ունեցող գործընթաց է հանդիսանում, իսկ ահա երկրորդն ակամայից, երբեմն նույնիսկ՝ գերլցված միզապարկի ճնշող ազդեցությամբ է խթանվում:

Հարցեր, պատասխաններ, մեկնաբանություններ