7 խորհուրդ կրծքով կերակրող մայրերին. news.am

Ինչպե՞ս իմանամ՝ երեխաս նորմա՞լ է սնվում: Այս հարցը բոլոր՝ կրծքով կերակրող մայրերին է հուզում, հատկապես երբ երեխան առնվազն երկու ժամը մեկ սնվելու ցանկություն է արտահայտում:

Չնայած հակառակ պատկերն էլ արհեստական կեր ստացող երեխայի պարագայում կարող է ի հայտ գալ, երբ կերակրումներն առնվազն 4-5 ժամ ընդմիջումով են իրականացվում: 

Կրծքով կերակրող կանանց շատ դեպքերում թվում է, թե հարկ եղածից քիչ կաթ են արտադրում: Մինչդեռ, փորձագետների գնահատմամբ, նմանատիպ բարդություն կանանց ընդամենը 5 տոկոսի մոտ է ի հայտ գալիս, ինչը կարող է անառողջ գեղձային հյուսվածքների, որեւէ այլ հիվանդության կամ կրծքի չափերի նվազեցմանը միտված վիրահատության արդյունք լինել, հաղորդում է FoxNews-ը:

Այնպես որ, քանի դեռ երեխայի մոտ նորմալ աճ է նկատվում, կարող եք համոզված լինել, որ կաթի անհրաժեշտ պաշար ունեք: Բայցեւայնպես, եթե այս հավաստիացմամբ էլ չկարողացաք բոլոր կասկածները ցրել, ստորեւ բերված յոթ խորհուրդներն ենք ներկայացնում՝ կաթի արտադրության ծավալների կարգավորման համար.

1. Կերակրեք՝ որքան կարող եք
   «Կերակրեք այնքան հաճախ, որքան երեխան է ցանկանում», - խորհուրդ է տալիս կրծքով կերակրման մասնագետի միջազգային վկայագիր ունեցող դոկտոր Իրեն Զոպին, որ Մեդելա բժշկական կենտրոնում խորհրդատվական ծառայության ղեկավարի եւ կլինիկական կրթության մասնագետի պաշտոնն է զբաղեցնում: Նրա համոզմամբ, որքան հաճախ եք երեխային կերակրում եւ կուրծքը կաթից ազատում, այնքան ավելի շատ է օրգանիզմը կաթ արտադրում: Այնպես որ կերակրման մեկ սեսիայի ընթացքում կարող եք երկրորդ կուրծքը դատարկելուց հետո կրկին առաջինին վերադառնալ, եթե, իհարկե, երեխան ցանկացա այդքան սնվել:
   
   
2. Ազատվեք ավելորդ կաթից
   Կանայք հաճախ են բողոքում, որ աշխատանքի վերադառնալուց հետո կաթի արտադրության ծավալների կրճատում է նկատվում: Երեւույթի պատճառն այն է, որ կրծքի մեջ հավաքված ավելորդ կաթից չեն ազատվում: Հատկապես  գիշերային ժամերին, երբ երեխան դեռ չի արթնացել կամ հերթական կերակրումը բաց է թողել, հարկավոր է ազատվել կուտակված կաթից: Նույն միջոցի օգնությանը կարող եք անգամ հերթական կերակրումից հետո դիմել՝ համոզվելու համար, որ կրծքերն ամբողջությամբ դատարկ են:
   
   
3. Կերակրման դիրքը ստուգեք
   Ոչ ճիշտ դիրքով կերակրելիս երեխան կարող է զրկված լինել անհրաժեշտ ծավալով կաթ քաշելու հնարավորությունից, ինչն էլ, իր հերթին, կարող է կաթի արտադրության ծավալների կրճատման հանգեցնել: Այնպես որ արժե մեկ անգամ էլ մասնագետի մոտ այցելել՝ կերակրման դիրքը ստուգելու համար: 
   
   
4. Ջուր խմեք միայն այն ժամանակ, երբ ծարավ եք
   Տարածված մոլորություն կա, թե որքան շատ ջուր խմեք՝ այնքան շատ կաթ կարող եք ունենալ: Մինդեռ նշվածը ոչ մի առնչություն չունի իրականության հետ, նշում է դոկտոր Զոպպին՝ հավելելով, թե ավելին՝ հարկավոր է ջուր խմել միայն այն ժամանակ, երբ ծարավ եք:
   
   
5. Ծծակից եւ շշից խուսափեք
   Ճիշտ է՝ լույս աշխարհ գալու առաջին օրերին ծծակի եւ շշի հետ ծանոթանալուց հետո էլ փոքրիկը դրանք երբեք մոր կրծքի հետ չի շփոթի, բայց այդ կերպ երեխային անհրաժեշտ ծավալով սնունդ մատուցելու եւ կաթի արտադրության ծավալները անհրաժեշտ մակարդակի վրա պահելու հնարավորությունը ձեռքից բաց կթողնեք: Բացի այդ, ծծակն ու շիշը կրծքով կերակրման նորմալ ֆիզիոլոգիական գործընթացը խախտելու հատկություն ունեն: Այնպես որ, դոկտոր Զոպիի խորհրդով, հարկավոր է առնվազն 3-4 շաբաթ սպասել՝ կաթի արտադրության ծավալների անհրաժեշտ կարգավորումը ձեռք բերելու համար, որից հետո կարող եք ծծակ եւ շիշ օգտագործել:
   
   
6. Սթրեսի մի տրվեք
   Սթրեսը միանշանական կարող է կաթի արտադրության ծավալների վրա ազդել, հատկապես երբ երեխան ինտենսիվ խնամքի կենտրոնում է պահվում: Եթե անգամ պարզվի, որ փոքրիկը առողջական խնդիրներ ունի եւ վիրահատության կարիք է զգում, հարկավոր է նախ եւ առաջ կաթի ծավալների մասին մտածել, հիշեցնում է դոկտոր Զոպին: Բացի այդ էլ, ծննդաբերությունն ինքնին կարող է սթրեսի աղբյուր լինել: Փոխարենը փորձեք մի փոքր ավելի երկար քնել, հանգստացնող վարժություններ կատարել եւ սթրեսը հաղթահարելու այլ միջոցներ գտնել:
   
   
7. Օգտակար խոտաբույսերի եւ դեղամիջոցների օգնությանը դիմեք
   Խոտաբույսային հավելումները, մասնավորապես՝ մանանեխի տեսքով, կարող են կաթի արտադրության ծավալները խթանելու հնարավորություն ընձեռել: Բացի այդ էլ, կարող եք նախապես մասնագետի հետ խոսել՝ հավելումների անհրաժեշտ չափաբաժինը հստակեցնելու նպատակով, քանի որ դրանք, ըստ ապրանքանիշի, կարող են տարբեր լինել: Ի հավելումն՝ բժիշկը կարող է նաեւ դեղամիջոցներ նշանակել, որոնք մեծ ի մասամբ անվտանգ են, բայց հնարավոր է՝ որոշ կողմնակի ազդեցություններ հրահրեն:

Հարցեր, պատասխաններ, մեկնաբանություններ