Գիտնականները ծննդաբերության ցավերի թեթեւացման համար քթի ցողացիր են մշակել. news.am

Հարավային Ավստրալիայի համալսարանից բժիշկ Ջուլի Ֆլիթը քթի քթի ցողացիր է մշակել, որը կօգնի հաղթահարել ցավը ծննդաբերության ընթացքում: Համալսարանը նրան արդեն 25,000 դոլարի դրամաշնորհ է տրամադրել, որպեսզի նա այս տարի եւս շարունակի հետազոտությունը:

Այդ միջոցի հիմքում ցավազրկող ֆենտանիլն է, որը ոչ պակաս արդյունավետ է, քան պետիդինի ներարկումները, որը ծննդաբերության ընթացքում հաճախ օգտագործվում է որպես ցավազրկող միջոց: Թքի ցողացիրի ստեղծման հեղինակի կարծիքով այն անհամեմատ ավելի հարմարավետ է, քան ներարկումները եւ ավելի արագ է գործում:

Նոր միջոցն արդեն փորձարկվել է ավստրալիական կլինիկաներից մեկի հիվանդների վրա: Միջոցը փորձած կանանց մոտավորապես 80%-ը տեղեկացրել է, որ կհամաձայներ եւս մեկ անգամ օգտագործել դա: Հիվանդները տեղեկացրել են, որ ցողացիրի օգտագործումից հետո անհամեմատ ավելի քիչ են սրտխառնուք  զգացել, իսկ վերականգնումն ընթացել է ավելի արագ, քան այլ դեղերի ներարկման դեպքում: Ավելին, նրանք կարող էին ինքնուրույն օգտագործել ցողացիրը` մանկաբարձի հսկողության ներքո:

Գիտնականները համարում են, որ նոր ցավազրկող միջոցը կարող է օգտագործվել էպիդուրալ անզգայացման փոխարեն, որն անհամեմատ բարդ է եւ կարող է լուրջ կողմնակի ազդեցություններ ունենալ: Ցողացիրի արժեքը չի գերազանցի 50 ԱՄՆ դոլարը:

Հարցեր, պատասխաններ, մեկնաբանություններ