Բժիշկները հղի կանանց խորհուրդ են տալիս շփվել ապագա երեխայի հետ. 1in.am

Մոր ձայնը ամենաառաջին հնչյուններից է, որը երեխան լսում է արգանդում: Վաղուց հայտնի է, որ երեխաները մոր արգանդում լսում են նրա սրտի բաբախը և բառերը: Սակայն մինչև այժմ հայտնի չէր, թե ինչպես է դա ազդում երեխայի զարգացման վրա: Հարվարդի բժշկական դպրոցի ուսումնասիրողները պարզել են, որ մոր ձայնը երեխայի մոտ լեզվական հմտություններ է զարգացնում, փոխանցում է The Daily Mail-ը:

Գիտնականները վաղաժամ ծնված 40 նորածինների երկու խմբի են բաժանել: Մեկ ամիս շարունակ օրական երեք ժամ առաջին խմբի երեխաները լսել են մոր սրտի բաբախի և ձայնի ձայնագրությունները: Երկրորդ խումբը միայն հիվանդանոցի ֆոնային աղմուկն է լսել: 30 օր անց երեխաների ուղեղները սկանավորել են:

Մոր ձայնը լսած մասնակիցների մոտ լսողական կեղևն ավելի մեծ է եղել, քան նրանց մոտ, ովքեր ֆոնային աղմուկ են լսել: Ուսումնասիրողները պնդում են, որ մոր ձայնի ձայնագրությունը վաղաժամ ծնված երեխաների զարգացման համար հիանալի գործիք է: Որոշ մասնագետներ վաղուց մայրերին խորհուրդ են տալիս հղիության ժամանակ խոսել երեխայի հետ կամ երգել նրանց համար:

Հարցեր, պատասխաններ, մեկնաբանություններ