Պաշտոնապես ՀՀ սերմնահեղուկ չի ներկրվում. Առողջապահության նախարարություն

Հայաստան սերմնահեղուկ ներկրելու համար անհրաժեշտ է, որպեսզի Հայաստանի Առողջապահության նախարարությունը տա համապատասխան թույլտվություն, և առ այսօր ԱՆ-ը չի հանդիպել որևէ դեպքի, երբ ինչ-որ մեկը ցանկանա Հայաստան ներկրել,,, սերմնահեղուկ, այս մասին Tert.am-ին ասաց ԱՆ աշխատակազմի ղեկավար Սուրեն Քրմոյանը:

Կառավարության համապատասխան որոշմամբ՝ մարդկանց և կենդանական ծագման սերմնահեղուկ և բուժման կամ կանխարգելման նպատակների համար նախատեսված այլ նյութեր, կարող են ներկրվել միմիայն ԱՆ թույլտվությամբ:
Հիշեցնենք, որ երեկ Ազգային ժողով–կառավարություն հարցուպատասխանի ժամանակ Հայ հեղափոխական դաշնակցություն կուսակցության պատգամավոր Արծվիկ Մինասյանը ԱԺ ամբիոնից հայտարարեց, որ «որոշ տեղեկությունների համաձայն` ՀՀ է ներկրվում սերմնահեղուկ` արհեստական բեղմնավորման նպատակով»:

Երեկ Առողջապահության նախարարը ներկա չէր ԱԺ նիստին և նրա փոխարեն հարցին պատասխանած Արդարադատության նախարար Հրայր Թովմասյանը, խոստացավ, որ իր բժիշկ կոլեգան գրավոր կպատասխանի այս մասնագիտական պարզաբանումներ պահանջող հարցին:

«Այսինքն՝ պաշտոնապես որևէ մեկը մեզ չի դիմել,և կարծում եմ՝ մաքսայինն էլ նման նյութ չի մաքսազերծել»,-ասաց Սուրեն Քրմոյանը:

Այսուհանդերձ, ԱՆ-ում հիմքեր չունեն չհավատալու ԱԺ ամբիոնից հայտարարություն արած պատգամավորի ողջամտությանը և առաջարկում են ավելի մանրամասն տեղեկություններ տրամադրել, որպեսզի ուսումնասիրեն բուժհաստատություններում բուժծառայությունների գործընթացի օրինականությունը:

Սուրեն Քրմոյանը հայտնեց իր անձնական կարծիքը, որ սերմնահեղուկն այն ապրանքը չէ, որ կարողանան զանգվածաբար ներկրել: «Դա անհատական բան է, յուրաքանչյուր մայր ինքն է որոշում բեղմանավորման խնդիրը: Բացի դրանից, օրենքը բավականաչափ մանրամասն կանոնակարգում է արհեստական բեղմնավորման խնդիրները՝ ով կարող է, ինչ կարող է, երբ.. և բժշկական հաստատությունները, որոնք ունեն վերարտադրողական առողջության լիզենզիա, այդ գործողություններն անելուց առաջ փոխնակ մորը, ձվաբջիջի և սերմնահեղուկի դոնորին հետազոտում են: Դրա համար անհասկանալի է՝ եթե տենց բան ներկրում են՝ ինչու և ոնց են ներկրում»,- ասաց Սուրեն Քրմոյանը:

Բացի փոխնակ մոր և բուժհաստատության միջև կնքվող տասնյակ պայմանագրերից, սերմնահեղուկի բեղմնավորման նպատակով ներկրումը պահանջում է որոշակի բժշկական և ջերմաստիճանային յուրահատուկ պայմաններ: Միևնույն ժամանակ հարց է առաջանում, թե արդոք Հայաստանում չկա սերմնահեղուկ, որ նախարարությունն ստիպված լինի ներկրել այն։

Տեսականորեն նման բան լինելու դեպքում զուտ գենետիկական տեսանկյունից ինչպե՞ս է խնդրին վերաբերվում Ան–ը։ Այլ խոսքով, թե օտարազգիի սերմնահեղուկն ինչ գենետիկական փոփոխությունների կարող է հանգեցնել հայերի գենոֆոնդում:
Առողջապահության նախարարությունն այս խնդրին նայում է առողջապահական տեսանկյունից, իսկ ԱՆ-ում պետական քաղաքականությունը որոշում է կառավարությունը: Այսինքն՝ բացի ԱՆ մասնագիտական կարծիքից, կան այլ գերատեսչություններ՝ ԱԳՆ, Արդարադատության նախարարություն, Աշխատանքի և սոցիալական ապահովության նախարարություն, որոնք այս դեպքում ևս պետք է տան իրենց կարծիքը, եթե խնդիրը դիտվում է ազգային անվտանգության հարթությունում:

Հարցեր, պատասխաններ, մեկնաբանություններ