Բժշկական ապահովագրությունը պետք է, բայց դրան երկիրը դեռ պատրաստ չէ. մասնագետներ.

Հայաստանի համար բժշկական ապահովագրությունը անհրաժեշտ է, բայց երկիրը դեռևս դրան պատրաստ չէ: Այսօրվա մամուլի ասուլիսում նման տեսակետ հայտնեց Վիլեն Հակոբյանը, ով նախկինում եղել է Երևանի պետական բժշկական համալսարանի ռեկտորը:

Պարտադիր բժշկական ապահովագրության համար, ըստ նրա, երկիրը պետք է ֆինանսապես ապահովված լինի, բնակչությունն էլ պետք է ապահովված լինի, քանի որ ամսական աշխատավարձից որոշակի տոկոսներ են պահվելու: «Ոչ պաշտոնական տվյալներով այսօր բնակչության 30 տոկոսը գործազուրկ է, իսկ ոմանց աշխատավարձը չնչին է»,-ասաց Վ. Հակոբյանը: Ըստ նրա, հենց ապահովագրական դաշտն էլ այսօր պատրաստ չէ պարտադիր ապահովագրության:

«Որոշ դեպքերում բժշկական ապահովագրությունն ավելի մեծ միջոցներ է պահանջում, և ամեն ապահովագրող չէ, որ պատրաստ է նման ռիսկի գնալ»,-ասաց նա: «Սուրբ Մարիամ» բժշկական կենտրոնի տնօրեն Գարիկ Մարտիրոսյանը համաձայնեց Հակոբյանի հետ, նշելով, որ բժշկական պարտադիր ապահովագրություն իրականացվում է քիչ թե շատ ապահովված երկրներում, որոնք քիչ թե շատ ֆինանսապես կայուն են և չկա ստվերային տնտեսություն: Նրա տվյալներով, բժշկական ապահովագրության արժեքը սկսվում է 100 դոլարից, կախված ծառայությունների փաթեթից գինը կարող է փոփոխվել՝ հասնելով 300 հազար դրամի:

«Այսօր ապահովագրական ընկերությունները մեծ պատրաստակամությամբ ապահովագրում են երիտասարդ մարզիկներին, քան ռիսկի խմբի անդամներին»,-ասաց նա: Խոսելով բնակչության՝ առողջության նկատմամբ վերաբերմունքի ու ապահովագրման կուլտուրայի մասին, Վ. Հակոբյանն ասաց, որ մարդիկ մտածում են, որ կյանքն ու առողջությունը հարատև են ու չեն հետևում իրենց առողջությանը: Պետպատվերի շրջանակում բուժվում է բնակչության միայն 8 տոկոսը, իսկ մյուսները նախընտրում են բժշկին դիմել միայն ծայրահեղ դեպքում: Իր եհրթին, Գ. Մարտիրոսյանն ասաց, որ հիվանդությունները երիտասարդանում են, ի հայտ են գալիս նոր վարակներ, ինչը ահազանգում է, որ հասարակությունը պետք է հետևողականորեն լինի այս հարցում:

Հարցեր, պատասխաններ, մեկնաբանություններ