Գենետիկ թեստը կորոշի քիմիաթերապիայի անհրաժեշտությունը քաղցկեղի դեպքում. news.am

Ամբողջ աշխարհի բժիշկները վաղուց էին սպասում այս թեստին, որը կօգներ որոշել, արդյո՞ք քաղցկեղով հիվանդին անհրաժեշտ է քիմիաթերապիան: Նման թեստ այսօր արդեն մշակվել է կաթնագեղձի քաղցկեղով հիվանդների համար:

Հինգ տարվա հետազոտությունների ընթացքում Լոնդոնի Institute of Cancer Research-ի գիտնականները հաստատել են թեստի արդյունավետությունը: Թեստը վերլուծում է կաթնագեղձի ուռուցքի գեները ու թույլ է տալիս որոշել քիմիաթերապիայի անհրաժեշտությունը ուռուցքի հեռացումից հետո:

Այս պահին հետվիրահատական քիմիաթերապիայի անհրաժեշտության մասին որոշումը բժիշկն է կայացնում՝ ուռուցքի չափերի ու ախտահարված ավշային հանգույցների մասին տեղեկությունների հիման վրա: Իսկ այս թեստը կարող է օգնել ավելի ճշգրիտ որոշել քիմիաթերապիայի անհրաժեշտությունը: Որոշ հիվանդ կանանց համար, պարզվում է, միանգամայն անվտանգ է քիմիաթերապիայի կուրս չանցնելը:

Գիտնականները թեստը ստուգել են 2600 կանանց վրա, ովքեր ունեին կաթնագեղձի տարածված ուռուցք՝ նման հիվանդներին կարող են եւ՛ հորմոնալ թերապիա նշանակել, եւ՛ քիմիաթերապիա: Վեց կանանցից յուրաքանչյուրը թեստի արդյունքում 12 միավորից քիչ էր հավաքել, ինչի հիման վրա նրանց միայն հորմոնալ թերապիա է նշանակվել: Հինգ տարի անց հիվանդության կրկնություն կամ քացկեղից մահ գրանցվել է հիվանդների միայն 6 տոկոսի մոտ: Այս տվյալները, ինչպես նշել է Օլեգ Գլուզը՝ Գերմանիայի Evangelical Hospital Bethesda-ից, վկայում են այն մասին, որ քիմիաթերաապիայից հրաժարվելն արդարացված է: Քիմիաթերապիայի գործածման դեպքում քաղցկեղի կրկնությունը կամ դրանից մահացությունն, ամենայն հավանականությամբ, 4 տոկոս կկազմեր, այսինքն, ընդամենը մեկ երրորդով պակաս: Ընդ որում, քիմիաթերապիան հսկայական կողմնակի բացասական ազդեցություն ունի, հիշեցնոմ են մասնագետները:

Այս պահին հետազոտությունը շարունակվում է, հեղինակները փորձի մասնակիցներին կհետեւեն եւս հինգ տարի:

Հարցեր, պատասխաններ, մեկնաբանություններ