Էնդոմետրիոզի բուժմանը միտված նոր դեղամիջոց է մշակվել. news.am

Էնդոմետրիոզ հիվանդությունը, որ սովորաբար կոնքային հատակը կազմող եւ որովայնում առկա օրգանների՝ արգանդի ներքին մակերեսը ծածկող լորձաթաղանթի նմանությամբ արտաքին «պաստառի» ձեւավորում է հրահրում եւ կարող է այնպիսի ցավ առաջացնել, որ բազմաթիվ կանայք նույնիսկ աշխատելու կամ որեւ բանով զբաղվելու հնարավորությունից են զրկվում (հատկապես թերապիայի բացակայության պայմաններում), բավականին լայն տարածմամբ է բնորոշվում:

Այդուհանդերձ, ժամանակակից բժշկությանը դեռեւս քիչ բան է հայտնի հիվանդության առաջացման պատճառների մասին եւ, հետեւաբար, արդյունավետ բուժամիջոցների պակաս է զգացվում:

Լավ նորությունն այն է, որ վերջերս մի քանի հետազոտություններ են նախաձեռնվել, որոնց ընթացքը բավականին խոստումնալից է էնդոմետրիոզով տառապող կանանց համար:

Խոսքը, մասնավորապես, բոլորովին վերջերս մեկնարկած կլինիկական փորձարկումների մասին է, որոնց շրջանակում Մեծ Բրիտանիայում գործող Բաթի համալսարանի դեղագործական ամբիոնը ներկայացնող գիտահետազոտական խմբերից մեկի ջանքերով մշակված նոր՝ E2MATE անվամբ հայտնի դեղամիջոցի եւ նորէթինդրոնացետատի՝ ավանդական պրոգեսթերոնի համադրության, վերարտադրողական տարիքի կանանց պարագայում հիվանդության բուժմանը միտված բարձր արդյունավետություն է գրանցել: Այդուհանդերձ, փորձագետների գնահատմամբ, թերապիայի՝ էնդոմետրիալ հյուսվածքների աճի կանխարգելման տեսանկյունից, հսկայական ներուժ դրսեւորող նորահայտ միջոցը դեռեւս հետագա փորձարկումների կարիք ունի: Համաձայն տեղեկությունների, երկու դեղամիջոցների համադրությունը արդեն իսկ առկա հյուսվածքների բջիջների թիվը նվազեցնելու հատկություն է ցուցաբերում:

Էնդոմետրիոզը չորս տիպի դրսեւորում կարող է ունենալ՝ նվազագույն, մեղմ, միջին եւ ծանր: Գիտնականներն, ի թիվս այլ հարցերի, դեռեւս պետք է պարզեն, թե հատկապես որ տիպի առկայության պարագայում է թերապիայի նոր միջոցն առավել արդյունավետ: Բացի այդ, հարկ է նաեւ բուժման արդյունավետության մակարդակի՝ հիվանդի տարիքից եւ մարմնի կշռից կախվածությունը պարզել:

Մի շարք այլ ընթացիկ հետազոտություններով հիվանդության առաջացման պատճառները պարզելու փորձ է արվում, ինչն իր հերթին կարող է առավել արդյունավետ բուժամիջոցների մշակման հանգեցնել:

Էդինբուրգի համալսարանին կից գործող վերարտադրողական առողջության կենտրոնի գիտնականները, մասնավորապես, պարզել են, որ նախընթաց հետազոտությունների շրջանակում գրանցված անհաջողությունների պատճառը հիվանդության ուսումնասիրման համար անհրաժեշտ կենդանական մոդելի ոչ ճիշտ ընտրությունն է եղել: Նրանք լաբորատոր մկան արգանդից տարածված էնդոմետրիալ հյուսվածքների ներպատվաստում են իրականացրել առողջ կրծողի օրգանիզմում եւ դրանց զարգացմանը հետեւել՝ համարելով, որ միայն այդպես կարելի է մարդու օրգանիզմում առկա էնդոմետրիոզի տարածման կրկնօրինակը ստանալ:

Երկրորդ հետազոտության շրջանակում հիվանդության բջջային մակարդակով ուսումնասիրություն է իրականացվում, իսկ երրորդն էնդոմետրիոզի ախտորոշման եղանակները բարելավելու նպատակ ունի:

Մինչ գիտնականները շարունակում են հիվանդության մեխանիզմները բացահայտել, արդեն իսկ ախտահարված կանանց խորհուրդ չի տրվում՝ նստել եւ բուժման գերարդյունավետ միջոցի սպասել: Հակառակը՝ հարկավոր է հնարավորինս շուտ թերապիայի ավանդական միջոցներից օգտվել՝ որքան հնարավոր է ցավից խուսափելու եւ կյանքի բնականոն հունին վերադառնալու համար:

Հարցեր, պատասխաններ, մեկնաբանություններ