Կոնքազդրային հոդի սքրինինգ. նեոնատոլոգ Մարինա Զարգարյան. morevmankan.am

Ի՞նչ է կոնքազդրային հոդի սքրինինգը

Մոր և մանկան առողջության պահպանման գիտահետազոտական կենտրոնում 2009 թ-ից սկսած կատարվում է կոնքազդրային հոդի դիսպլազիայի սքրինինգ հետազոտություն:

Կոնքազդրային հոդի սքրինինգի արդյունքում հայտնաբերվում է կոնքազդրային հոդի զարգացման այնպիսի անկանոնություն, որը դիտվում է երեխաների կյանքի առաջին ամիսներին, և համապատասխան միջոցներ կիրառելիս, որպես կանոն, չի վերածվում ազդրի հոդախախտի։ Եթե նախկինում այն կոչվում էր բնածին հոդախախտ, ապա հիմա ամբողջ աշխարհում ընդունված է այն անվանել զարգացող հոդախախտ: Կան երեխաներ, ովքեր ծնվում են առանց հոդախախտի, բայց թույլ զարգացած կոնքազդրային հոդով, և եթե երեխային ճիշտ չխնամեն, այդ ոչ ճիշտ զարգացած հոդը կարող է վերածվել հոդախախտի:

Ե՞րբ և ինչպե՞ս է այն իրականացվում

Կոնքազդրային հոդի սքրինինգը կոնքազդրային հոդի սոնոգրաֆիան է, որի արդյունքում հայտնաբերվում են նորածինների մոտ կոնքազդրային հոդի հետ կապված խնդիրները:

Ցանկալի է այն իրականացնել մինչև 3 ամսական հասակը:

Ի՞նչ նպատակ է հետապնդում

Կոնքազդրային հոդի դիսպլազիան բավականին հաճախ է հանդիպում՝ 1000 երեխայից 6 կամ 7 երեխայի մոտ: Հետազոտության նպատակն է հայտնաբերել այդ երեխաներին, ուղեգրել նեղ մասնագետի մոտ հետագա դինամիկ հսկողության և բուժման նպատակով:

Որո՞նք են կոնքազդրային հոդի դիսպլազիայի ռիսկի գործոնները

Հոդախախտի առաջացման հստակ պատճառը բժշկագիտության համար մինչ օրս  մնում է անհայտ: Այն դրսևորվում է կոնքազդրային հոդերի անհամաչափությամբ: Ձախ հոդի հոդախախտը հանդիպում է մի քանի անգամ ավելի հաճախ (60 %), քան աջակողմյան կամ երկկողմանի հոդախախտը (յուրաքանչյուրը՝ 20 %):

Կան կոնքազդրային հոդի դիսպլազիայի զարգացման տարբեր ռիսկի գործոններ, որոնք կարևոր է իմանալ`

• Ժառանգական նախատրամադրվածություն (հիվանդության կրկնման ռիսկը ընտանիքի մյուս երեխաների մոտ 20 % )
• Սեռ (իգական) գրանցված դեպքերի 80 %
• Կապանային գերձգելիություն
• Կոնքային առաջադրություն
• Առաջնածին երեխա
• Այլ բնածին արատների առկայություն
• Հետծննդյան խնամքի սխալներ (բարուրելը)
• Ինչպե՞ս վարվել, երբ երեխայի մոտ ախտորոշվել է կոնքազդրային հոդի դիսպլազիա

Եթե կասկածներ կան, կամ երեխան ռիսկի խմբում է, պետք է դիմել մասնագետի՝ մանկական օրթոպեդի, խորհրդատվության նպատակով:

Ի՞նչ պետք է իմանան ծնողները

Վաղ շրջանում հոդախախտի վերացումն ավելի հեշտ է և մատչելի: Հոդախախտերից խուսափելու, դրանց առկայության դեպքում վաղ հայտնաբերման և լիարժեք բուժման համար անհրաժեշտ է զերծ մնալ երեխաներին բարուրելուց: Իսկ ոչ ճիշտ, անհամաչափ քայլվածքի դեպքում ծնողները պետք է դիմեն մանկական օրթոպեդի:

Որքանո՞վ է հնարավոր շտկել առկա խնդիրը

Եթե ծնողները հետևողական են և կատարում են բժշկի բոլոր խորհուրդները, ապա խնդիրը լիարժեք լուծվող է:

Հարցեր, պատասխաններ, մեկնաբանություններ