Պատվաստումների հակացուցումները. ե՞րբ երեխաներին չի կարելի պատվաստել. med.news.am

Գրեթե բոլոր ծնողները ցանկանում են իմանալ, թե որո՞նք են պատվաստումների հիմնական հակացուցումները, եւ ո՞ր դեպքերում երեխաներին չի կարելի պատվաստել։

Այս հարցերի շուրջ NEWS.am Medicine-ի թղթակիցը զրուցեց իմունականխարգելման հարցերով հանրապետական խորհրդատվական հանձնաժողովի անդամ, «Հերացի» թիվ 1 հիվանդանոցային համալիրի գլխավոր բժշկի ամբուլատոր գծով տեղակալ Աննա Բալյանի հետ։

Ահա պատվաստումների այն հիմնական հակացուցումները, որոնք նշեց Աննա Բալյանը.

1. Ծանր ալերգոլոգիական ռեակցիա կամ անաֆիլակտիկ շոկ՝ նախորդ պատվաստումից հետո։ Եթե առաջին պատվաստումից հետո երեխայի մոտ նմանատիպ ծանր ռեակցիաներ են եղել, դա լուրջ հակացուցում է հաջորդ պատվաստումն անելու համար։
    
2. Ցանկացած հիվանդության սուր ընթացքը հակացուցում է բոլոր պատվաստումների համար։ Եթե երեխայի ջերմությունը բարձր է, պատվաստումն արժե հետաձգել մի քանի օրով կամ շաբաթով, մինչեւ երեխան ապաքինվի։
    
3. Ծանր իմունոդեֆիցիտային վիճակները կենդանի պատվաստումների համար հակացուցված են։ Կենդանի պատվաստումների թվում են ԲՑԺ-ն, պոլիոմիելիտը, կարմրուկը, կարմրախտը եւ խոզուկը։
    
4. ԲՑԺ-ի եւ հեպատիտ Բ-ի դեմ պատվաստումները, որոնք կատարվում են հենց ծննդատանը, հակացուցված են, եթե երեխայի քաշը 1700 գրամից պակաս է։ Սակայն երեխան կարող է պատվաստվել ավելի ուշ, երբ քաշ հավաքի եւ երբ մանկաբույժը որոշի, որ երեխան արդեն առողջ է եւ պինդ։
    
5. Մեծահասակ մարդկանց էլ կարող են պատվաստումները հակացուցված լինել։ Հղի կանանց, օրինակ, հակացուցված են կարմրուկի եւ կարմրախտի պատվաստումները։

«Մնացած հիվանդությունները, որոնք նախկինում համարվում էին հակացուցում, այսօր վերանայված են եւ արդեն հակացուցում չեն համարվում։ Օրինակ, թիմուսի մեծացումն այսօր արդեն հակացուցում չէ», - ասաց Աննա Բալյանը։

Հարցեր, պատասխաններ, մեկնաբանություններ