Սա պետք է իմանան բոլորը. ինչի՞ վրա ուշադրություն դարձնել երեխային պատվաստելիս. med.news.am

Որոշել եք, որ Ձեր երեխան պետք է պատվաստու՞մ ստանա: ՀՀ ԱՆ Հիվանդությունների վերահսկման և կանխարգելման կենտրոնի մանրէային պատրաստուկների բաժնի վարիչ Ալմաստ Հարոյանը պատմեց NEWS.am Medicine-ի թղթակցին, թե ինչին է պետք անպայման ուշադրություն դարձնել  պոլիկլինիկայում՝ երեխային պատվաստելիս:

Նախեւառաջ խնդրեք բուժաշխատողին ցույց տալ պատվաստանյութը եւ ներարկիչը:

Ուշադիր զննեք պատվաստանյութը եւ առաջին հերթին ուշադրություն դարձրեք սրվակի վրա նշված սերիային եւ պիտանելիության ժամկետին: Պարզ է, որ այն չպետք է ժամկետն անց լինի:

Ուշադրություն դարձրեք սրվակի վրայի հատուկ ինդիկատորին, որը ցույց է տալիս, որ պատվաստանյութը պահվել է ճիշտ ջերմաստիճանում: Բանն այն է, որ պատվաստանյութը պետք է պահել հատուկ սառնարաններում՝ +8 աստիճանից ոչ բարձր ջերմաստիճանում: Ինդիկատորը սովորաբար բաց մանուշակագույն է, բայց եթե պատվաստանյութը պահել ավելի բարձր ջերմաստիճանում, ինդիկատորի գույնը կմգանա, հասկացնելով բժիշկներին եւ Ձեզ, որ այս պատվաստանյութն այլեւս օգտագործել չի կարելի:

Եթե պատվաստանյութի հետ ամեն ինչ կարգին է, զննեք ներարկիչը:

Այն, բնականաբար, պետք է լինի մեկանգամյա օգտագործման: Ալմաստ Հարոյանն ասաց, որ իրենք բոլոր պոլիկլինիկաներին մատակարարում են հատուկ «ինքնաոչնչացվող» ներարկիչներ, որոնք ցանկության դեպքում էլ հնարավոր չէ մեկ անգամից ավել օգտագործել՝ այն ուղղակի կոտրվում է: Ուշադիր եղեք, որ բժիշկը հենց այդպիսի ներարկիչ օգտագործի:

Ստուգեք նաեւ ներարկիչի տուփը եւ պիտանելիության ժամկետը: Ցանկալի է, որ տուփը հենց Ձեր աչքի առաջ բացեն: «Եթե ամբողջականությունը խախտված է եւ պիտանելիության ժամկետը չի երեւում, ջնջված է, հստակ ընթեռնելի չի, ավելի լավ է այդ ներարկիչը գցել արկղի մեջ», - ասաց Ալմաստ Հարոյանը NEWS.am Medicine-ի թղթակցին:

Եթե պատվաստանյութի, ներարկիչի եւ այդ ամենը Ձեզ ցույց տվող բժշկի համբերատարության հետ ամեն բան կարգին է, կարելի է արդեն պատվաստել երեխային:

Հարցեր, պատասխաններ, մեկնաբանություններ