1829 թ. օգոստոսի 13-ին ծնվել է ռուս ֆիզիոլոգ, ֆիզիոլոգիայի դպրոցի հիմնադիր Իվան Սեչենովը

Իվան Միխայիլի Սեչենովը ծնվել է 1829թ. օգոստոսի 13-ին այժմյան  Նիժնի Նովգորոդ շրջանի Սեչենովո գյուղում: 1848 թ. ավարտել է Պետերբուրգի Գլխավոր ճարտարագիտական դպրոցը և 1856 թ. Մոսկովյան համալսարանի բժշկության ֆակուլտետը:

1856-1859 թվականներին Բեռլինում աշխատել է Յոհաննա Մյուլերի, Է. Դյուբա-Ռեյմոնի և Ֆ. Հոպպե-Զեյլերի, Լեյպցիգում` Օ. Ֆյունգի, Հեյդելբերգում` Կ. Լյուդվիգի, Հերման Հելմգոլցի լաբորատորիաներում:

1860թ. Սենչովը գլխավորել է Պետերբուրգի ակադեմիայի ֆիզիոլոգիայի ամբիոնը, որտեղ շուտով կազմավորել է ֆիզիոլոգիայի լաբորատորիա՝ առաջիններից մեկը Ռուսաստանում:

Իր «Գլխուղեղի ռեֆլեքսները» դասական աշխատության մեջ, որը լույս է տեսել 1863թ., նա հիմնավորել է գիտակցական և ոչ գիտակցական գործունեության ռեֆլեկտոր բնույթը, ապացուցել, որ բոլոր հոգեկան երևույթների հիմքում ընկած են ֆիզիոլոգիական գործընթացները, որոնք կարող են հետազոտվել օբյեկտիվ մեթոդներով:

Սեչենովը նաև բացահայտել է կենտրոնական արգելակման երևույթները, նյարդային համակարգում գրգիռների գումարումը, հաստատել է կենտրոնական նյարդային համակարգում կենսաէլեկտրական ռիթմիկ գործընթացների առկայությունը, հիմնավորել գրգիռի առաջացման մեջ նյութափոխանակության գործընթացի նշանակությունը, հետազոտել արյան շնչւառական ֆունկցիան:

Ի.Պ. Պավլովը Սեչենովին անվանել է «ռուսական ֆիզիոլոգիայի հայր»:

Սեչենովի ֆիզիոլոգիայի դպրոցի վերջնական ձևավորումը տեղի ունեցավ 1863-ից մինչև 1868 թվականները:

1889 թվականից Սեչենովը զբաղեցրել է անհատ-դոցենտի պաշտոն, իսկ 1891 թվականից՝ Մոսկովյան համալսարանի ֆիզիոլոգիայի պրոֆեսորն էր: 1901 թվականից նա անցավ թոշակի, սակայն շարունակեց փորձարարական աշխատանքները և Պրեչիստենյան դասընթացներում մանկավարժական գործունեությունը:

Ի. Մ. Սեչենովը մահացել է 1905 թ. նոյեմբերի 15-ին Մոսկվայում, 76 տարեկան հասակում:

Հարցեր, պատասխաններ, մեկնաբանություններ