Մարտի 8-ին ծնվել է ռուս հոգեբույժ Պյոտր Գաննուշկինը

Պյոտր Բորիսովիչ Գաննուշկինը ծնվել է 1875 թ. մարտի 8-ին (փետրվարի 24) Ռյազանի նահանգում, գյուղական բժշկի բազմազավակ ընտանիքում:

1884 թ. ընտանիքը տեղափոխվում է Ռյազան։ Պյոտրը 9 տարեկան էր, երբ ընդունվեց Ռյազանի տղամարդկանց 7-րդ գիմնազիան: Սովորել է գերազանց, հատուկ ունակություններ դրսևորել լեզուների հանդեպ: Արդեն 13 տարեկանից սկսել է հետաքրքրվել մարդկանց բնավորություններով:

1893 թ`. գիմնազիան ավարտելով ոսկե մեդալով, Պյոտրը նույն տարում ընդունվում է Մոսկվայի համալսարանի բժշկական ֆակուլտետը: Երրորդ կուրսից, որպես ապագա մասնագիտություն, նա ընտրեց հոգեբանությունը: 1898 թ.` ավարտելով բժշկական ֆակուլտետը, Գաննուշկինինn աշխատանքի է անցնում Մոսկովյան համալսարանի հոգեբուժական կլինիկայում, որտեղից էլ սկսվում է իր բժշկական գործունեությունը, իսկ 1899 թ. հիանալի պաշտպանում է դոկտորական դիսերտացիան:

Պյոտր Բորիսովիչը եղել է հեռատես ախտորոշիչ և բացառիկ զգոն բժիշկ: Նրա հետազոտությունները կապված են եղել հոգեկան սահմանային խանգարումների ոլորտի հետ` նորմայում և պաթոլոգիայում: Գաննուշկինը հատուկ հարգանքի և հեղինակության է արժանացել որպես ամբուլատոր եղանակների վարպետ: Նա սովորեցնում էր բժիշկներին` տալու վաղ ախտորոշումներ հոգեկան հազիվ նկատելի փոփոխությունների դեպքում, ինքն անձամբ շաբաթական ընդունում էր մինչև 300 մարդ:

Ոչ պակաս ակտիվ, քան բժշկական գործունեությունը, Գաննուշկինի գիտական գործունեությունն էր: Նա «Ժամանակակից հոգեբուժություն» պարբերականի հիմնադիրներից էր, որը մեծ դեր է խաղացել ռուսական հոգեբուժության զարգացման ոլորտում: Հենց Պյոտր Բորիսովիչն էր կանգնած սովետական հոգեբույժների մեծ դպրոցի ստեղծման ակունքներին:

Գաննուշկինի բազմամյա հետազոտությունների արդյունքներն ամփոփվում են նրա «Փսիխոպաթիաների կլինիկա. նրանց ստատիկան, դինամիկան և սիստեմատիկան» դասական մենագրությունում, որը պարունակում է ախտաբանական բնավորությունների հիմնական տեսակների, էական յուրահատկությունների վառ և մանրամասն նկարագրություն: Այդ աշխատությունը Գաննուշկինին բնութագրում է որպես հոգեկան հիվանդությունների ոչ ծավալուն ձևերի «փոքր» հոգեբուժության ստեղծող: 

Գաննուշկինի առողջության կտրուկ վատթարացման պատճառով նրան վիրահատում են վիրաբուժության հայտնի պրոֆեսորներ Ա. Վ.Մարտինովը և Վ. Ն. Ռոզանովը, բայց փրկել չեն կարողանում…

Պյոտր Բորիսովիչ Գաննուշկինը մահացել է 1933 թ. փետրվարի 23-ին Մոսկվայում, թաղվել է մայրաքաղաքի Նովոդևիչյան գերեզմանատանը:

Հարցեր, պատասխաններ, մեկնաբանություններ