1859 թ. հունվարի 9-ին ծնվել է ռուս հայտնի բժիշկ-հոգեբույժ Պյոտր Պետրովիչ Կաշենկոն

Պյոտր Պետրովիչ Կաշենկոն ծնվել է 1859 թ. հունվարի 9-ին (1858 թ. դեկտեմբերի 28) Եյսկ քաղաքում (այժմ՝ Կրասնոդարի երկրամաս): Նրա հայրը եղել է ռազմական բժիշկ:

Պյոտրը սովորել է Մոսկվայի համալսարանում, որից հեռացվել է ուսանողական ցույցերին մասնակցության պատճառով: 1885 թ. քննություններ է հանձնել Կազանի համալսարանում և աշխատանքի անցել Կազանի օկրուգային հոգեբուժական հիվանդանոցում որպես բժիշկ-հոգեբույժ, իսկ մի քանի տարի անց Ներքին Նովգորոդում դառնում հիվանդանոցի տնօրեն։ Այնուհետև տեղափոխվում է Մոսկվա` դառնալով հոգեկան հիվանդների հաշվառման Կենտրոնական բյուրոյի ստեղծման նախաձեռնողը: 

1904-1906 թթ. Կաշենկոն Մոսկվայի հոգեբուժարանի տնօրենն էր, իսկ 1907-1917 թթ.՝ Պետերբուրգի հոգեբուժական հիվանդանոցի տնօրենը: Այս երկու հիվանդանոցներն էլ կրում էին նրա անունը: 1917 թ. մայիսից տնօրինել է Բժշկական կոլեգիաների Խորհրդի նյարդա-հոգեբուժական սեկցիան, 1918-1920 թթ.  ղեկավարել է ՌԽՖՍՀ Առողջապահության Ժողովրդական Կոմիսարիատի նյարդա-հոգեբուժական ենթամասը:

Կաշենկոն շատ զգույշ էր վերաբերում «խելագար» ախտորոշմանը, քանի որ  խելագարության և հանճարեղության, ցնորքի և շնորհալիության սահմանը, նրա կարծիքով, շատ նուրբ է: Նա հոգեկան հիվանդությունների բուժման մեթոդներ է մշակել (ամբուլատոր բուժում, աշխատաբուժում, պատրոնաժ և այլն), որոնք այն ժամանակվա համար առաջադիմական էին:

Պյոտր Պետրովիչ Կաշենկոն մահացել է 1920 թ. փետրվարի 19-ին, հուղարկավորվել է Նովոդեվիչյան գերեզմանատանը: Նրա գերեզմանի վրա գրված է՝ «Ռուսական հոգեբուժության հիմնադիր»:

Հարցեր, պատասխաններ, մեկնաբանություններ