«Իզմիրլյան» բժշկական կենտրոնի տնօրեն Արմեն Չարչյանի Սուրբ Ծննդյան և Ամանորի շնորհավորանքը և ուղերձը. izmirlianmedicalcenter.com

Հարգելի հայրենակիցներ, շնորհավորում եմ բոլորիս՝ Սուրբ Ծննդյան և գալիք` 2019 թվականի առիթով, ցանկանում եմ, որ 2019 թվականը լինի առողջության, իմաստության, խաղաղության  և կայունության տարի: Մաղթում եմ, որ փոփոխությունների ժամանակաշրջանն ավարտվի, որպեսզի կայունանա և ավելի կանխատեսելի լինի ապագան: Դա, իր հերթին, կբերի ժողովրդի բարեկեցության կտրուկ աճի:

2018 թվականը հայ ժողովրդի համար, ինչպես նաև «Իզմիրլյան» բժշկական կենտրոնի աշխատակիցների համար, շատ բուռն, իրադարձություններով լեցուն, լուրջ փոփոխություններով տարի էր: Բայց, այդքան բուռն լինելով հանդերձ, նաև կայուն տարի էր:

Այս տարին փաստեց, որ մեր զարգացման կայունությունն անխափան է և շարունակական, մենք բավականին լուրջ ցուցանիշներ ունենք. պացիենտների հաճախելիության և վիրահատությունների քանակի 20-22 տոկոս աճ:

Հարկ եմ համարում նշել, որ ցուցաբերած բժշկական ծառայությունների շարքում բավականին մեծ տեղ են զբաղեցնում բարդ դեպքերը, որոնք պահանջում են հատուկ մոտեցում և համակցված վիրահատություններ, և որոնք մեզ հաջողվել է հաղթահարել:

Առավել կարևորն այն է, որ ժողովրդի մոտ բարձրացել է «Իզմիրլյան» բժշկական կենտրոնի հեղինակությունը և ճանաչելիությունը: Այն, որ մեր աշխատակիցները գոհունակ ու փայլող աչքերով են աշխատանքի գալիս, ճիշտ կազմակերպված աշխատանքի արդյունք է: Նրանք բավարարված են, լիարժեք աշխատանքային ռիթմով են աշխատում` առանց կողմնակի ակնկալիքների:

Այս ամենը հետագա մարտավարությունը կառուցելու հիմնական պայմաններն են, ինչն ինձ ոգևորում և ուժ  է տալիս:

Ունենալով շատ արգասաբեր, փոփոխություններով լի և կայուն տարի, 2018-ը դրական եմ համարում «Իզմիրլյան» ԲԿ պատմության մեջ:

Մայր Աթոռին պատկան մարմին լինելը հսկայական պատասխանատվություն է Ամենայն Հայոց Կաթողիկոսի և Մայր Աթոռի առջև, և, միևնույն ժամանակ, գերագույն պատիվ : Մենք միշտ մեր հոգիներում և գործենության ընթացքում  զգում ենք Վեհափառ Հայրապետի օրհնությունն ու հոգածությունը:

Դրանով է պայմանավորված նաև այն, որ շատ ավելի խիստ ու պատասխանատու ենք վերաբերվում մեր պարտականությունների կատարմանը, մարդասիրական, բարեգործական գործոններն առավել ընդգծված են մեզ մոտ և մեր գործունեության զգալի մասն ուղղված է բարեգործությանը:

Եկող՝ 2019 թվականի ամենամեծ ծրագիրն ինձ համար Համահայկական միջազգային բժշկական համաժողովն է, որը տեղի է ունենալու Երևանում, հուլիսի 4-6-ը, և որի նախագահը պատիվ ունեմ լինելու ես: Այդ համագումարի կազմակերպմանն են ուղղված մեր ամբողջ ներուժն ու հնարավորությունները: Փորձելու ենք ամեն բան անել, որպեսզի համագումարը կազմակերպվի և անցկացվի պատշաճ բարձր մակարդակով:

Հաջորդ կարևոր խնդիրը գալիք տարում, թերևս, առավել կենտրոնացումն է լինելու մասնագիտական հարցերին, համաշխարհային նորություններին տեղեկացմանը, տիրապետմանը և ներդրմանը Հայաստանում:

Կյանքում ամենակարևորը, թերևս, առողջությունն է: Ես միշտ ինքս ինձ հարց եմ տվել` կա՞ ավելի թանկ բան, քան մարդու կյանքը: Կարծում եմ, հայրենիքն է, անկախությունը, ազատությունը, ինչի համար մեր ժողովրդի պանծալի զավակները գիտակցաբար զոհել են իրենց կյանքը: Այդուհանդերձ, զուտ մասնագիտական տեսանկյունից, խաղաղ ժամանակներում մարդու կյանքն ամենաթանկն է, ուստի մենք պետք է բազմապատիկ զգոն լինենք, ուշադիր, ավելի մարդասիրական մոտեցում ցուցաբերենք մեր ժողովրդին` վերադարձնելու խաթարված առողջությունը: Մաղթում եմ, որ առողջությունը, հաջողությունը, աշխատասիրությունը և մեր ժողովրդին բնորոշ իմաստությունը մեզ ուղեկցեն նաև 2019 թվականին:

Ակնկալում եմ աշխարհին և Հայաստանին խաղաղություն, որովհետև խաղաղությունը բիբլիական, հասկացություն է, և շատ աղոթքներում հնչում է՝ «Խաղաղություն ամենեցուն» արտահայտությունը, և կամ ընդուված մսղթանք է. «Խաղաղություն  տանն այս»:

Առաջնային է նաև հոգեկան խաղաղությունը: Աշխարհի բոլոր պատերազմներն ու խռովությունները պատճառ չեն, դրանք արդյունք են հոգեկան ոչ խաղաղ վիճակների: Բժիշկների շրջանում ընդունված խոսք կա. «Եթե հիվանդը չի ուզում բուժվել, բժշկությունն անզոր է»: Այսինքն, եթե հիվանդի մոտ հոգեկան խաղաղություն չկա, ներդաշնակություն չկա աշխարհի հետ, մենք անզոր ենք: Ուստի մարդկությանը մաղթում եմ հոգեկան խաղաղություն և հենց այս բառերով. «Խաղաղություն ամենեցուն», իսկ մնացյալն արդեն կհետևի դրան:

Հարցեր, պատասխաններ, մեկնաբանություններ